Հինգշաբթի, 7 Մարտ 2024-ի յետմիջօրէին, Բերիոյ Հայոց Թեմի Բարեջան Առաջնորդ Գերաշնորհ Տ. Մակար Սրբ. Եպս. Աշգարեան իր մասնակցութիւնը բերաւ Սուրիոյ ճարտարարուեստի նախարարութեան հովանաւորութեամբ եւ Հալէպի ճարտարարուեստի գրասենեակի Գործարար Տիկիններու Յանձնախումբին կազմակերպութեամբ տեղի ունեցող «Սայիտաթ ալ-Շահպաա» ցուցահանդէս-վաճառքի բացման արարողութեան, պետական բարձրաստիճան պատասխանատուներու խումբին հետ, «ալ-Շահպաա Ռոզ» համալիրի «ալ-Շարք» ցուցասրահէն ներս։
Պաշտօնական խումբին մաս կը կազմէին Հալէպի նահանգապետ Հուսէյն Տիապ, Հալէպի կուսակցապետ Ահմատ Մանսուր, Հալէպի ճարտարարուեստի գրասենեակի նախագահ երկրչփ. Ֆարէս ալ-Շահապի եւ պետական պատասխանատուներ։
Սրբազան Հօր պատուիրակութեան մաս կը կազմէին Հոգշ. Տ. Արմէն Աբղ. Գալաճեան, Ազգ. Վարչութեան եւ Հալէպի առեւտրական գրասենեակի անդամ տիար Յարութ Չամիչեան, որոնք ջերմապէս դիմաւորուեցան Հալէպի ճարտարարուեստի գրասենեակի Գործարար Տիկիններու Յանձնախումբի ատենապետ երկրչփ. Անի Մարկոսեան֊Ասլանեանի եւ յանձնախումբի անդամներուն կողմէ, որոնց մէջ կը գտնուի նաեւ Թալին Միկրոյեան-Ալեքսանեան։
Ցուցահանդէսին նպատակն է սուրիացի տիկիններուն առիթ ընծայել՝ ցուցադրելու եւ վաճառելու իրենց արտադրութիւնները, որպէսզի տնտեսական ծանր պայմաններուն մէջ կարողանան նիւթապէս նեցուկ կանգնիլ իրենց ընտանիքներուն։
Սրբազան Հայրը շրջելով ցուցահանդէսի տաղաւարները, քաջալերեց եւ գօտեպնդեց մասնակիցները, որոնց կարգին կը գտնուին նաեւ հայորդիներ։