ՀՅԴ Հայաստանի Գերագոյն Մարմինի ներկայացուցիչ, Ազգային ժողովի «Հայաստան» խմբակցութեան պատգամաւոր Իշխան Սաղաթէլեան Տաւուշի մարզ կատարած այցելութեան շրջանակներուն մէջ ներկայացուցած է տաւուշեան ճգնաժամի յաղթահարման ուղղութեամբ իրականացուելիք ծրագիրներն ու գործողութիւնները: Այս առիթով ան կատարած է հետեւեալ յայտարարութիւնը.
«Շաբաթ օրը «Հայաստան» խմբակցութեան գործընկերների հետ կրկին Տաւուշի մարզում էինք:
Այս ընթացքում մեր բոլոր հանդիպումները եւ շփումները յստակ ցոյց են տալիս, որ Տաւուշում իշխանութեան առաջարկած միակողմանի զիջումների օրակարգի դէմ ձեւաւորուել է հանրային հակազդեցութիւն:
Տաւուշի մեր հայրենակիցներն ամբողջութեամբ գիտակցում են միակողմանի զիջումների հետեւանքները, ինչը տեղական մակարդակում առաջացրել է բաւականին լուրջ հակազդեցութիւն:
Տեղում այս ուղղութեամբ մեծ ծաւալի աշխատանքներ են իրականացնում ընդդիմադիր քաղաքական ուժերը, հոգեւոր, հանրային-հասարակական գործիչները, որոնց ուղերձը մէկն է` կանգնել տաւուշցու արդար պահանջի կողքին:
Սակայն, ոչ պակաս կարեւոր խնդիր է հարցի տեղայնացումից խուսափելը: Անվտանգութեանը սպառնացող այն մարտահրաւէրը, որի առջեւ այսօր կանգնած է Տաւուշում ապրող մեր հայրենակիցը, դա միայն իր խնդիրը չէ. սա համազգային նշանակութեան հարց է:
Հետեւաբար, հակազդեցութիւն եւ դիմադրութիւն պէտք է ձեւաւորել միաժամանակ երեք հարթութեան` տաւուշեան, համահայաստանեան եւ համահայկական մակարդակների վրայ:
Վերը նշուած բոլոր ուղղութիւններով աշխատանքներն ընթացքի մէջ են:
Նշեմ դրանցից մի քանիսը, որոնք ծրագրաւորել ենք առաջիկայ օրերին.
– Ազգային ժողովում հրատապ օրակարգով նիստ, յայտարարութեան նախագծի ներկայացում,
– Ազգային ժողովում խորհրդարանական լսումներ,
– աշխատանք միջազգային հարթակներում,
– մարզային հանդիպումների շարք,
– անվտանգութեան հարցերով մասնագիտական քննարկումների, հաւաքների կազմակերպում,
– համահայկական տարողութեամբ իրազեկման եւ զօրակցական ցոյցերի իրականացում:
Մենք այս բոլոր մակարդակներում համատեղ ուժերով պէտք է ձեւաւորենք իրական հակազդեցութիւն եւ համազգային դիմադրութիւն, որն ի զօրու կը լինի կոտրել չդադարող զիջումների շղթան եւ բեկել մեր ընթացքը»: