«Արմէնփրէս».- ՀՀ Արտագին Գործոց Նախարարութեան խօսնակ Աննա Նաղդալեան Ատրպէյճանի ԱԳ նախարարին Ուաշինկթընի մէջ տեղի ունեցած խորհրդակցութիւններուն մասին վերջին յայտարարութիւնը մեկնաբանած է:
Աննա Նաղդալեան յայտնած է, որ Ատրպէյճանի ԱԳ նախարարի պնդումները չեն համապատասխանիր իրականութեան. նման մօտեցում ապակառուցողական է, որուն հետեւանքով խաղաղ գործընթացի լրջութիւնը կ’արժէքազրկուի:
«Ինչպէս յայտնած էինք տակաւին Ուաշինկթընի հանդիպումէն առաջ, որու ընթացքին վերջին շրջանին ատրպէյճանական կողմի պատճառով սրուած իրավիճակի հանդարտեցման հարցեր քննարկուած են: Համանախագահները կոչ ըրած են անմիջապէս քայլեր ձեռնարկելու՝ վերականգնելու համար խաղաղութեան նպաստող միջավայրը եւ պահպանելու հրադադարը, եւ ապա մարդասիրական ոլորտին եւ վտանգները նուազեցնող յստակ առաջարկներով հանդէս եկած են: դԱտրպէյճանական կողմի ապատեղեկատուութիւնը կը յանգեցն է եզրակացութեան, որ Ատրպէյճանը մտադրուած չէ իրականացնելու համանախագահներուն այդ կոչերը եւ առաջարկները:
Աւելին, այն պնդումը, որ բանակցութիւնները կրնան յաջող ընթանալ զինադադարի կանոնաւոր խախտումներով, կարգաւորման ուղղութեամբ գործադրուող ջանքերուն լրջագոյն վնաս կը հասցնէ եւ կը խաթարէ խաղաղ գործընթացը»,-յայտնած է Աննա Նաղդալեան:
Ուաշինկթընի մէջ 20 Յունիսին տեղի ունեցած է Հայաստանի եւ Ատրպէյճանի ԱԳ նախարարներ Զոհրապ Մնացականեանի եւ Էլմար Մամետեարովի հանդիպումը ԵԱՀԿ Մինսքի խմբակի համանախագահներուն հովանաւորութեամբ:
Ինչպէս հաղորդած է «Ինթերֆաքս» գործակալութիւնը, Ատրպէյճանի Արտագին Գործոց նախարար Էլմար Մամետեարով յայտարարած է, որ Ուաշինկլընի մէջ ԵԱՀԿ Մինսքի խմբակի համանախագահները առաջարկներ ներկայացուցած են քննարկման համար: Ան ընդգծած է, որ Ուաշինկթընի մէջ համանախագահները առաջարկած են «զօրքերու դուրսբերում եւ խաղաղապահներու տեղակայում»: