ԲՆԱԿԱՆ ԲՈՅՍԵՐՈՎ ԲՈՒԺՈՒՄ
Իւրաքանչիւր հիւանդութեան դէմ պայքարելու համար տաք բուսաջուր պէտք է պատրաստէք: Բնութիւնը դարմանումի յատուկ խոտերով, բոյսերով եւ տերեւներով հարուստ է: Պէտք է օգտագործենք բնութեան մէջ աճող այդ բոյսերը:
1-Աղիքային որդի եւ մանրէներու դէմ պայքարելու համար կարելի է դեղձենիի, ընկուզենիի կամ երիցուկի տերեւները մէկ լիթր եռացած ջուրի մէջ պահել հինգ վայրկեան, որպէսզի բոյսերուն հիւթը լուծուի ջուրին մէջ եւ ապա սուզել եւ ջուրը խմել՝ օրական մէկէն երեք գաւաթ:
2-Հազի պարագային՝ կարելի է լեռնային ծոթրինի, ընկուզենիի, մանիշակի կամ մեխակի տերեւներով նման բուսաջուրեր պատրաստել:
3-Կուրծքի եւ կոկորդի ցաւի պարագային՝ ձիթենիի տերեւներէն օգտուիլ:
4-Ցղատապի (պրոնշիթ) պարագային՝ բաղեղի տերեւները օգտագործել:
5-Պնդութեան պարագային՝ դեղձենիի, վարդի եւ կոճապղպեղի տերեւներէն օգտուիլ:
6-Մարսողութեան, փորհարութեան, շաքարախտի եւ մկանային ցաւերու դէմ պայքարելու համար օգտագործել շումրայի, անիսոնի, նարնջենիի տերեւները:
7-Լեարդի բորբոքումներուն եւ մարմինի ջերմաստիճանի բարձրացումին պարագային՝ կիտրոնի, նարինջի կամ ձիթենիի տերեւները օգտագործել:
8-Հարբուխի եւ աղիքային խանգարումներու պարագային՝ ընկուզենիի եւ անանուխի տերեւները:
9- Անքնութեան եւ բորբոքումի պարագային օգտագործել նարնջենիի, շոճիի, կաղնիի եւ անանուխի տերեւները:
11-Գլխացաւի, միկրէնի եւ անախորժութեան պարագային՝ յասմիկը, մարիամխոտը, թրնջխոտը եւ ընկուզենիի տերեւները:
Այս բուսաջուրերը պէտք է օրական պատրաստենք, իսկ զանոնք համեղ եւ մեր գիմքին հաճելի դարձնելու համար կարելի է անոնց աւելցնել մէկ թէյի դգալ մեղր:
ԲՈՅՍԵՐ, ՈՐՈՆՔ ՅԱՋՈՂՈՒԹԻՒՆ ԿԸ ԲԵՐԵՆ
Հաւանաբար անհաւատալի կը թուի որ բոյսերուն յաջողութիւն կը բերեն, սակայն իւրաքանչիւրս փորձով կրնանք ապացուցել այս իրողութիւնը: Գոյութիւն ունին բոյսեր, որոնք յաջողութիւն եւ դրամական վիճակի բարելաւում կը բերեն:
ԴՐԱՄԻ ԲՈՅՍ (ԵՐՋԱՆԿՈՒԹԵԱՆ ԺԱՅՌ)
Ափրիկեան ծագումով այս բոյսը լայն տարածում ունի աշխարհի մէջ: Ան իր անուանումը ստացած է շնորհիւ իր տերեւներուն, որոնք մետաղադրամներու կը նմանին:Եթէ կը հաւատաք այս բոյսի ուժին եւ կրնաք պահել զայն ձեր տան մէջ, դուք կը հարստանաք. ան քմահաճ չէ եւ մեծ խնամք չի պահանջեր:
ԵՐՋԱՆԻԿ ՊԱՄՊՈՒ
Այս բոյսին տերեւները իւրայատուկ զարդարանք կը համարուին, իսկ բոյսը այնքան քիչ խնամք կը պահանջէ, որ կրնայ աճիլ նոյնիսկ առանց բնական հողի:
ԿԻՏՐՈՆ
Կիտրոնի ծառը կրնանք սովորական ձեւով աճեցնել, բայց ժամանակը շատ կարեւոր է: Շատեր կը պնդեն, որ կ’արժէ այս հրաշագործ ծառը աճեցնել, քանի որ անոր շնորհիւ ոչ միայն նիւթական յաջողութիւն կը գտնէք, այլեւ համերաշխութիւն կը տիրէ ձեր ընտանիքին մէջ:
ՔԱՔՏՈՒՍ
Շատեր կը պնդեն, որ քաքտուսը իր մէջ կը պահէ միջավայրի բացասական ջերմուժը, մեզի վերապահելով դրականը:
Քաքտուսը օժտուած է նաեւ նիւթական յաջողութիւններ բերելու յատկութեամբ: Ան նոյնիսկ բնակարանը կը պաշտպանէ գողերէ եւ վատ ջերմուժէ, ճառագայթներէ եւ այլն:Այդ պատճառով ալ պէտք է զայն պահենք մեր գրասենեակին կամ խոհանոցին մէջ:
Սոնա Տէր Պօղոսեան-Տարաքճեան