«Ասպարէզ».-Ուքրանական լրատու աղբիւրներ կը հաղորդեն, թէ 35ամեայ հայ քաղաքական գործիչ Միխայիլ-Պնօ Հայրիեան նշանակուեցաւ Քիեւի շրջանային կուսակալ։ Երկրին նախարարաց խորհուրդը վաւերացուց երկրին եօթը շրջաններուն մէջ նոր կուսակալներ նշանակելու որոշումը եւ Քիեւի շրջանի կուսակալի պաշտօնը յանձնեց Միխայիլ-Պնօ Հայրիեանին։
Հայազգի գործիչը ծնունդով պաքուեցի է։ Ան Մոսկուայի մէջ համալսարանական ուսում ստանալէ ետք շրջան մը աշխատած է Ուքրանիոյ Ռուսաստանի դեսպանատան մէջ։ 2010-2013 թուականներուն ան եղած է Ուքրանիոյ Արտաքին Գործոց Նախարարութեան խորհրդական, իսկ յաջորդող տարիներուն՝ երկրի ուժանիւթի նախարարութեան ռազմավարական ծրագիրներու եւ Եւրոպայի հետ համարկումի բաժինի պատասխանատուն։