Օգոստոս 8-ի գիշերն էր, բոլորս հաւաքուած ԱՔԵՃ-ի շրջափակին մէջ կը սպասէինք ՍԵՄ-ի տարեկան բանակումի մեկնումի ժամուն։
Ապրանքները հանրակառքին մէջ տեղաւորելէ ետք ճամբայ ելանք ու երկար ճամբորդութենէ ետք հասանք Դամասկոսի Սէյտնայա գիւղը, ուր Քեսապի փոխարէն տեղի պիտի ունենար ՍԵՄ-ի տարեկան բանակումը, նկատի ունենալով երկրի ապահովական պայմանները:
9 Օգոստոս 2019-ին սկիզբ առաւ ՍԵՄ-ի տարեկան բանակումը, որ նուիրուած էր ՍԵՄ-ի հիմնադրութեան 40-ամեակին: 2019 տարեթիւը կը զուգադիպէր նաեւ Ռոստոմի մահուան 100-ամեակին, ուստի բանակումը կոչուեցաւ «Ռոստոմ»։
Այս տարի բանակումին կը մասնակցէին Հալէպէն, Քեսապէն, Լաթաքիայէն եւ Դամասկոսէն 150 ընկեր-ընկերուհի։
Բանակումին առաջին օրը բոլոր մասնակիցները բաժնուեցան խումբերու, իւրաքանչիւր խումբին մաս կը կազմէին զանազան մասնաճիւղերէ եւ շըրջաններէ ընկերներ: Սա առիթ ընծայեց, որ բանակող ընկեր-ընկերուհիները ծանօթանան իրարու եւ մտերմանան։ Առաջին օրը բանակողներուն տրամադրուեցան գեղեցիկ գազակներ ու գլխարկներ։
Բանակումի ընթացքին Կեդրոնական Վարչութիւնը իւրաքանչիւր մասնաճիւղի յանձնած էր որոշ յայտագրեր, ինչպէս հարց-պատասխանի մրցում, դաշտային խաղեր եւ այլն…: Այս խաղերուն ընթացքին հաճելի մրցակցութեան մթնոլորտ մը կը ստեղծուէր խմբակներուն միջեւ։
Ստացանք բացառիկ եւ օգտաշատ դասախօսութիւններ եւ մասնակցեցանք զրոյցներու, որոնք անմիջական կապ ունէին մեր առօրեայ կեանքին հետ։ Կազմապերպուեցան արշաւներ եւ պտոյտներ՝ աւազանագնացութիւն, Սէյտնայա ուխտավայր այցելութիւն եւ այլն:
Բանակողներէ կազմուած չորս յանձնախումբեր, կազմակերպեցին հրաշալի խարուկահանդէս մը, որմով եզրափակուեցաւ բանակումը։
7 օրերու ընթացքին մենք սորվեցանք ընկերասիրութիւն, փոխադարձ յարգանք, հաւաքական աշխատանք հասկացութիւնները: Իսկ ամենակարեւորը՝ ծանօթացանք նոր ընկերներու եւ վերջին վայրկեաններուն դժուարաւ բաժնուեցանք իրարմէ։
Բանակումի օրերը կ’անցնէին շատ արագ: Ամէն օր լի ու լի կը գործադրէինք ճշդուած օրակարգի կէտերը, կը պատրաստուէինք խարոյկի: Օր մըն ալ անդրադարձանք, որ հասած ենք բանակումին աւարտին, մեկնումի ժամն էր, իրաքանչիւրը պիտի վերադառնար իր քաղաքը, սակայն քաղցր յուշերն ու բարեկամութիւնը պիտի ապրէին յաւերժ, իսկ մենք, հարստացած նոր գիտելիքներով, նոր մտածելակերպով պիտի ծրագրէինք մեր առօրեան։
Խարուկահանդէսը աւարտած էր: Ունէինք քանի մը ժամ միասին արեւածագը դիմաւորելու, որպէսզի «Ռոստոմ» բանակումի փակման արարողութիւնը կատարէինք։
Հասաւ մեր բոլորին անցանկալի պահը՝ բաժանումը, երբ առաջին օրը ծանօթացանք չէինք պատկերացնէր, որ բանակումի աւարտին արցունքոտ աչքերով պիտի բաժնուինք իրարմէ։
Հասաւ մեկնելու ժամը, ընդունելի չէր մեզի համար ամբողջ տարի մը սպասել կրկին հանդիպելու համար, այդուհանդերձ յուզումնախառն ուրախութեամբ մէկս միւսին ցտեսութիւն ըսինք՝ յաջորդ տարուան բանակումին կրկին տեսնուելու եւ անկրկնելի պահեր ապրելու յոյսով։
Այս բոլոր առաւելութիւնները յիշելով չմոռնանք մեր խոհարարը՝ ընկհ.Բէկին, որ ճիգ եւ ջանք չխնայեց մեզ կուշտ պահելու եւ համեղ կերակուրներ պատրաստելու։
Բանակում կազմակերպելը պատերազմական պայմաններու մէջ մեծ ջանքերու կը կարօտի, սակայն ՍԵՄ-ին համար յոյժ կարեւոր այս գործունէութիւնը ամէն զոհողութիւններ յանձն առնելով իրականացուցին մեր ընկերները, իսկ մենք ներշնչուեցանք ընկերային այս առողջ մթնոլորտին պահպանումով, ու համոզուեցանք որ ամէն դժուարութիւն կարելի է յաղթահարել կամքի եւ հաւատքի ուժով, բայց մանաւանդ աշխատանքով ու պատասխանատուութիւն կրելու յանձնառութեամբ:
Անժելա Չաղլասեան
եւ Աւօ Պօղոսեան
եւ Աւօ Պօղոսեան