Սեւան Քելէշեան ծնած է Հալէպ: Յաճախած է Կիլիկեան վարժարան, աւարտելէ ետք ընդունուած է տնտեսագիտական համալսարան: Երկու տարի յաճախած է Հալէպի Համազգայինի Հայագիտական քառամեայ հիմնարկը, ապա հեռակայ կարգով հետեւած է Հայաստանի «Խաչատուր Աբովեան»ի անուան մանկավարժական համալսարանի «Նախադպրոցական մանկավարժութիւն եւ հոգեբանութիւն» բաժինի դասաւանդութեան: Վերջինս աւարտելէ ետք ուսումը շարունակած է Երեւանի պետական համալսարանի լրագրական բաժինէն ներս (masters):
Սեւանը այսօր իր «Համեմունքով հայ» Ֆիլմով հանդէս կու գայ որպէս երիտասարդ հեղինակ, բեմադրիչ եւ դերասան:
«Գանձասար»ը, քաջալեր հանդիսանալով երիտասարդ մտքերու, հարցազրոյց ունեցաւ «Համեմունքով Հայ» Ֆիլմի նախաձեռնող, արտադրող, բեմագրող (սենարիստ) եւ գլխաւոր դերասան Սեւան Քելէշեանին հետ:
Սեւանը տեղեկացուց, որ ֆիլմը նկարուած է «Գալուստ Կիւլպէնկեան» հիմնարկութեան հովանաւորութեամբ: Ֆիլմին մէջ կը մասնակցին Հայաստանի զանազան շրջաններէ նաեւ տարբեր երկիրներէ հայեր, ինչպէս՝ Սուրիայէն, Լիբանանէն, Պոլիսէն, Քանատայէն, Պարսկաստանէն, Ամերիկայէն, Ֆրանսայէն, Ափրիկէէն, Համշէնէն, Թիֆլիսէն, Գաւառէն, Գիւմրիէն, Արցախէն եւ Լոռիէն: Յիշեալ շրջաններէն եկած իւրաքանչիւր հայ ֆիլմին մէջ կը ներկայանայ իր բարբառով ու մշակոյթով եւ այս մէկը ֆիլմի ամենակարեւոր առանձնայատկութիւններէն մէկը կը համարէ Սեւանը, հաստատելով, որ այս ձեւը որդեգրած է նպատակ ունենալով հեռու մնալ շինծու կրկնօրինակութենէ:
Սեւանը ընդգծեց, որ ֆիլմին մէջ իր մասնակցութիւնը բերած է աշխարհահռչակ հայ երաժիշտ ու երգիչ Արթօ Թունչպոյաճեան: Արթօն ոգեշնչուելով տիրող մշակութախառն մթնոլորտէն եւ զգալով հայերու միջեւ առկայ տարբերութիւններու համն ու հոտը` ֆիլմի նիւթին առնչուող երգ ստեղծած է, որ հնչած է ֆիլմին մէջ իր մասնակցութեամբ ու երգեցողութեամբ:
Սեւանը ամենայն հարազատութեամբ պատմեց նկարահանման ընթացքին դիմագրաւած դժուարութիւններուն մասին, ընդգծելով, որ այդ բոլորը հիմա հպարտութեամբ կը յիշէ: Ան պատմեց, որ Ֆիլմը նախատեսուած էր նկարահանել ամրան շրջանին, սակայն համաճարակի եւ անոր յաջորդող Արցախի պատերազմին պատճառներով նկարահանումները յետաձգուած են: Պատերազմի օրերուն քանի մը անգամ փոխած է ֆիլմին բեմագրութիւնը (սենարը): Ան տարբեր հոգեվիճակներ ապրած է, մէկը միւսը հակասող պարագաններ. անընդհատ ուզած է փոխել գրած խօսքերը, սրբել եւ նորը գրել: Անոր միտքն ու սիրտը պայքարի մէջ եղած են պատահած է, որ տարիներու համոզումներէն բխած ու գրած խօսքերուն դէմ ելլէ, Սեւանին միտքերը հակասած են սիրտին ձայնին… :
Սեւանը յայտնեց, որ այս բոլորէն յետոյ դժուար եղած է հոգեպէս պատրաստ ըլլալ նկարահանման, մինչեւ իսկ նկարահանման օրը եղանակի տեսութիւնը աշխատած է իրենց դէմ. չնախատեսուած եղանակը դժուարացուցած է նկարահանումը, պայծառ օրը փոխուած է անձրեւոտ օրուան` կարկուտ, անձրեւ, փոթորիկ, սակայն հաւատալով, որ ֆիլմի գաղափարը ինքնին ազգանուէր աշխատանք է, նաեւ՝ պարտականութիւն յանձն առնելն ու ամբողջ անձնակազմը նկարահանման տանիլը պարտաւորեցնող հանգամանք է, վերագտած է իր ուժը: Սեւանը չէ յուսալքուած, որովհետեւ կը հաւատայ որ ֆիլմաշխարհ մուտք գործող լաւ մասնագէտը պարտաւոր է տոկալ ու դիմակայել չնախատեսուած դժուարութիւններուն…
Սեւանին մեր ուղղած այն հարցումին թէ ի՞նչ է «Համեմունքով Հայ» ֆիլմին փոխանցած պատգամը, ան պատասխանեց. «Հայաստան փոխադրուելէս ի վեր տեսնելով հայերուս լեզուի, բարքերու ու սովորութիւններու տարբերութիւնները եւ այդ տարբերութիւններէն բխած անհամաձայնութիւնները, տարած աշխատանքներուս նպատակակէտը դարձուցի տարբեր ձեւաչափերով եւ տարբեր բնագաւառներու մէջ ջանալ լուծել այս հարցը, այս տարբերութիւնները որպէս հարստութիւն եւ բազմազանութիւն ընդունիլ տալով»:
Այս ֆիլմը Սեւանին հեղինակային «Ի՞նչ Կ’ըսեմ, Ի՞նչ Կ’ըսես» հաղորդաշարին շարունակութիւնն է` տարբեր ձեւաչափով: Այս երկու հեղինակային աշխատանքները վերեւ նշուած նոյն պատգամը կը փոխանցեն: «Համեմունքով Հայ» ֆիլմը «Ի՞նչ Կ’ըսեմ, Ի՞նչ Կ’ըսես»ը ընդլայնելով կը ձուլուի բարբառներու աշխարհին մէջ, կը հրամցնէ բարբառները իրենց առանձնայատկութիւններով` ընդգծելով իւրաքանչիւրին համն ու հոտը:
Ֆիլմաշխարհի այս առաջին փորձէն ետք Սեւանը ի՞նչ կը մտածէ, պիտի կրկնէ՞ փորձը, եթէ` այո՛, ինչ նիւթերով. «Թէեւ այս առաջին փորձն է, բայց առաջին անգամը չէ որ ջանք ու ճիգ թափելով հասած եմ իմ նպատակակէտին: Երբ ազգանուէր աշխատանք կ’ընես եւ կը հանդիպիս դժուարութիւններու շատ երկար չես մտածեր, կը ճեղքես ճամբան ու կ’անցնիս, չես նայիր անցած քարքրոտ ճանապարհիդ, կը բարձրանաս ու յաջորդին մասին կը մտածես: Հայրենասէր հետեւորդներուս ուրախութեամբ կ’ուզեմ տեղեկացնել, որ յաջորդ ֆիլմի բեմագրութիւնը (սենարը) արդէն պատրաստ է, մնացած է ապահովել նկարահանման ծախսերը ու գործի նետուիլ: Յաջողութիւն մեզի եւ ուրախ դիտում ձեզի` Հայաստանէն ներս եւ դուրս գտնուող, աշխարհով սփռուած համեմունքով հայեր»:
Սեւանը շնորհակալութիւն յայտնեց ֆիլմի աշխատակազմին, որուն անդամները ըմբռնումով մօտեցած են աշխատանքներուն եւ մինչեւ վերջ իր կողքին կանգնած, նաեւ բոլոր անոնց, որոնք հասկցած ու ընկալած են ֆիլմին նպատակն ու գաղափարախօսութիւնը եւ մնացած «Համեմունքով Հայ»ի համեմունքով հայերը:
«Գանձասար»