Ծանօթ էի Վահէ Պէրպէրեան դերասանին եւ արուեստագէտին, բայց ծանօթ չէի գրողին:
Բախտի բերմամբ ձեռքս անցաւ անոր «Յանուն Հօր Եւ Որդւոյ» գիրքը: Մեծ հետաքրքրութեամբ սկսայ կարդալ եւ յաջողեցայ մէկ օրուան մէջ աւարտել զայն: Գիրքը հօր մը եւ անոր զաւկին միջեւ ծաւալած վիճաբանութիւնը չէր միայն, այլ այդ վիճաբանութեան սրումը ամերիկացի աղջկան մը,- անկոչ հիւրի մը,- յայտնուելով, ինչ որ կ’արտացոլէր հայրական գուրգուրանքի պակասը զաւկին կեանքին մէջ: Պատմութիւնը կը սկսի հերոսին՝ Հրայրին, այս խօսքերով՝ «Ամէն պատմութիւն իր աւարտը ունի եւ ամէն աւարտ՝ իր պատմութիւնը: Ասիկա աւարտի մը պատմութիւնն է»: Խօսք մը, որ անմիջապէս պատմութեան կը կապէ ընթերցողը:
Գիրքին լեզուն պարզ ու անմիջական է, որ միեւնոյն ատեն կը մնայ որակեալ բարձունքի մը վրայ:
Վէպը ամբողջութեամբ գրի առնուած է Հրայրին տեսանկիւնէն եւ իւրաքանչիւր ընթերցող կրնայ ինքզինք գտնել Հրայրին մէջ: Հրայր գիտակցաբար սխալելուն անուն տուած է՝ լարքել, ան շատ յաճախ կը լարքէ եւ լարքած վայրկեանին իսկ կը զղջայ։ Միթէ՞ մենք եւս շատ յաճախ չենք լարքեր։ Վէպին մէջ առկայ են դէպի անցեալ ճամբորդութիւններ, որոնք ա՛լ աւելի կը շարժեն ընթերցողին հետաքրքրութիւնը եւ կ’արդարացնեն ներկայ դէպքերուն ընթացքը։ Ինքնատիպ, համարձակ եւ ընթերցողին վրայ ազդեցութիւն ձգող վէպ մըն է։ Այո՛, դէպքերը կը կատարուին ԱՄՆ-ի մէջ, բայց Հրայրին հոգեկան տագնապը կրնայ հարազատ ըլլալ իւրաքանչիւրիս։
Վեհան Պարսումեան