Այս տարի, պսակաձև ժահրի համաճարակին հետեւանքով, միայն շաբթուան մը ուշացումով, Շաբաթ, 16 Հոկտեմբերի առաւօտեան, տեղի ունեցաւ ճեմարանականներու Թարգմանչաց Վարդապետաց յիշատակումը։
Հանդիսապետութեամբ Բերիոյ Հայոց Թեմի Առաջնորդ Գերշ. Տ. Մասիս Ս. Եպս. Զօպուեանի, ներկայութեամբ Ճեմարանի Խնամակալութեան, Տնօրէնութեան և Ուսուցչական կազմին, ինչպէս նաև Ժ. և ԺԱ. կարգերու աշակերտութեան տեղի ունեցաւ հանդիսաւոր Ս. Պատարագ, Ս. Գրիգոր Լուսաւորիչ եկեղեցւոյ կամարներուն ներքև։
Առ ի գիտութիւն, սոյն եկեղեցին Հալէպի մէջ միակն է, որուն Ս. Խորանի աջ և ահեակին, տեղադրուած են Գիրերու Գիւտի հիմնադիրներու՝ Ս. Մեսրոպ Մաշտոցի և Ս. Սահակ Պարթև հայրապետի լուսանկարները։
Արարողութեան աւարտին, ներկաները ուղղուեցան դէպի Ճեմարանի շրջափակ, ուր հոգեհանգստեան պաշտօն կատարուեցաւ Ճեմարանի հիմնադիրներու և հանգուցեալ կրթական մշակներու հոգիներուն։
Ինչպէս ամէն տարի, այս տարի ևս աւանդաբար, ճեմարանականներ, որպէս ուխտապահ սերունդ, այցելեցին մեծ հայասէր Քարէն Եփփէի և գրականագէտ Յակոբ Օշականի շիրիմները, ծաղկեպսակներ զետեղեցին և վերանորոգեցին իրենց ուխտը՝ մեր նախնեաց արժանաւոր ժառանգորդները դառնալու։
Թարգմանչաց Տօնը Ճեմարանի տօնն է նաև. ա՛յս գիտակցութեամբ կրթական սոյն հնոցէն ներս կը թրծուին սերունդներ, ազգային դաստիարակութեամբ ու հայեցի կրթութեամբ։
Տօնդ շնորհաւոր, Ճեմարա՛ն …