Միացեալ Նահանգներու ծերակուտականներ Պոպ Մենենտեզ եւ Ճեք Ռիտ` համապատասխանաբար Ծերակոյտի արտաքին յարաբերութիւններու յանձնախումբի եւ Զինեալ ուժերու յանձնախումբերու նախագահները Պայտընի վարչակազմին կոչ ուղղած են շտապ օգնութիւն ուղարկել Արցախ (Լեռնային Ղարաբաղ) եւ ուժեղացնել ճնշումը Ատրպէյճանի վրայ` վերցնելու այնտեղ բնակող 120000 հայերու միամսեայ շրջափակումը իրենց բնիկ հայրենիքին մէջ: Այս մասին կը հաղորդէ Ամերիկայի Հայ Դատի յանձնախումբը:
«Ատրպէյճանի շրջափակումը դադրեցնելը պէտք է սկսի Ալիեւի փտած եւ ցեղապաշտական վարչակարգին Միացեալ Նահանգներու զինուորական օգնութեան դադրեցումով», ըսած է Ամերիկայի Հայ Դատի յանձնախումբի գործադիր տնօրէն Արամ Համբարեան` ողջունելով ծերակուտականներու դիրքորոշումը:
Միացեալ Նահանգներու արտաքին գործոց նախարար Էնթընի Պլինքընին ուղարկուած միացեալ նամակին մէջ ծերակուտականներ Մենենտեզն ու Ռիտը խոր մտահոգութիւն կը յայտնեն Ատրպէյճանի շրջափակման մասին` նշելով, որ Ատրպէյճանը պէտք է պատասխանատուութեան ենթարկէ խաղաղ բնակչութեան սննդամթերքի եւ առաջին անհրաժեշտութեան ապրանքներու հասանելիութիւնը փակելու համար:
Անոնք նշած են, որ Միացեալ Նահանգները պէտք է քայլերու ձեռնարկեն պաշարուած բնակչութեան մարդասիրական օգնութիւն ու անհրաժեշտ օգնութիւն հասցնելու ուղղութեամբ:
«Մենք պէտք է աջակցինք այն կազմակերպութիւններուն, որոնք կ՛աշխատին օգնութիւն տրամադրելու համար, ինչպէս նաեւ աշխատինք ամբողջ Եւրոպայի մեր համախոհ գործընկերներուն հետ, որոնք նոյնպէս մտահոգութիւն յայտնած են Պաքուի գործողութիւններուն վերաբերեալ` ճնշում գործադրելու Ալիեւի վարչակարգին վրայ` դադրեցնելու այս անընդունելի շրջափակումը», նշուած է նամակին մէջ: