Արցախի Հանրապետութեան նախագահի աշխատակազմի տեղեկատուութեան գլխաւոր վարչութենէն կը հաղորդեն, որ Արցախի Հանրապետութեան նախագահ Բակօ Սահակեան 24 Օգոստոսին այցելած է Ստեփանակերտի ջրամատակարարման շարք մը կեդրոններ եւ ծանօթացած է մայրաքաղաքի բնականոն ջրամատակարարման վերականգնումի աշխատանքներուն:
Երկրի ղեկավարը կարեւոր համարած է քաղաքին մէջ յառաջացած ջրամատակարարման հարցը կարելիութիւններու համաձայն, կարճ ժամկէտով լուծելու անհրաժեշտութիւնը` որոշակի յանձնարարականներ տալով շահագրգիռ մարմիններու ղեկավարներուն:
Նախագահին կ’ընկերակցէին պետնախարար Գրիգորի Մարտիրոսեան, Ստեփանակերտի քաղաքապետ Սուրէն Գրիգորեան եւ պաշտօնատար այլ անձինք: