ՍՕ Խաչի Շրջ. Վարչութեան Դաստիարակչական Յանձնախումբի կազմակերպութեամբ, Ուրբաթ, 18 Հոկտեմբեր 2019-ին, յետմիջօրէի ժամը 4։30-ին, ԱՄԺ ՏԱՆ «Լեւոն Շանթ» սրահին մէջ տեղի ունեցաւ զրոյց-հանդիպում մը կենսոլորտի եւ բնապահպանութեան նախկին նախարարուհի Նազիրա Սարգիսի հետ։
Հանդիպումին ներկայ էին Հայաստանէն ժամանած Հայաստանի մարդասիրական առաքելութեան 3-րդ խումբի բժիշկները, Շրջ. Վարչութեան անդամներ, դպրոցներու տնօրէններ եւ խաչուհիներ։
Բարի գալուստի խօսքէն ետք, Դաստիարակչական Յանձնախումբի անունով Զեփիւռ Աւագեան ողջունեց նախարարուհիին ներկայութիւնը ՍՕ Խաչի մեծ ընտանիքէն ներս եւ կենսագրական հակիրճ տեղեկութիւններ տուաւ նախարարուհիին մասին։
Նազիրա Սարգիս Հալէպի համալսարանը աւարտելէ ետք արժանացած է նաեւ Տարրալուծարանային քիմիագիտութեան մաքիստրոսի եւ դոկտորականի տիտղոսներուն եւ կը վարէ Հալէպի Պետական Համա- լսարանի Դեղագործական բաժինի նախագահի պաշտօնը։
2012-2016 նշանակուած է Սուրիոյ բնապահպանութեան եւ կենսոլորտի նախարար։
Ան նկարներու միջոցաւ ներկայացուց օդի, ջուրի եւ հողի ապականումը եւ անոնց նպաստող պատճառները, որուն մէջ բնութեան երեւոյթները նաեւ իրենց դերակատարութիւնը ունին։
Յատուկ ձեւով անդրադարձաւ մթնոլորտը ապականող վնասակար նիւթերու ազդեցութեան։
Ան շեշտեց նաեւ թէ բնութիւնը ինքնաբերաբար կը վերամաքրէ ինքզինք (recycling), սակայն անհրաժեշտ է նաեւ վերամշակել աղբերը, որովհետեւ աղբերու կուտակումը այլ բարդութիւններու դուռ կը բանայ։
Դասախօսը անհրաժեշտ նկատեց բարձրացնել քաղաքացիին գիտակցութիւնը, որպէսզի այս ոլորտին մէջ օգնէ պետական համակարգին։
Դասախօսութեան վերջին բաժինով առիթ տրուեցաւ զրուցելու նախարարուհիին հետ։ Ան սրտբացօրէն պատասխանեց ներկաներու հարցումներուն։