ԱՀ նախագահ Արայիկ Յարութիւնեան յայտարարութիւն տարածած է.
«Այսօր Արցախն ու Հայաստանը յայտնուել են միջազգային ահաբեկչութեան դէմ պայքարի առաջնագծում` բառիս բուն իմաստով: Սակայն մեր դէպքում առանձնայատկութիւնն այն է, որ համաշխարհային քաղաքակրթութեան գոյութեանը սպառնացող այս թշնամին մեր հայրենիքի դէմ դուրս է եկել արդէն ՄԱԿ անդամ պետութեան դրօշի տակ քօղարկուած, այդ պետութեան կանոնաւոր բանակի կազմում եւ շատ յաճախ այդ կանոնաւոր բանակի փոխարէն: Ժամանակակից աշխարհում, երբ տառացիօրէն հնարաւոր չէ ոչինչ թաքցնել ոչ մէկից, բոլորն իրենց աչքերով տեսել ու արձանագրել են համաշխարհային ջիհադիստական ահաբեկչական ցանցի ներթափանցումն Ատրպէյճան: Աշխարհում որեւէ պետութեան համար արդէն գաղտնիք չէ, որ այդ հրէշաւոր տեռորիստական ցանցի թիրախում Արցախի ու Հայաստանի խաղաղ բնակչութիւնն է, մեր քաղաքներն ու գիւղերը, ազատ ապրելու ու մեր ճակատագիրը տնօրինելու իրաւունքը:
Այդ ցանցի շարունակական սնուցումն ու կառավարումն իրականացնող Թուրքիան այսօր Պաքուի պատեհապաշտ իշխանութիւնների համաձայնութեամբ ծառայեցնում է Ատրպէյճանը` որպէս գործիք` Հարաւային Կովկասում համաշխարհային ահաբեկչութեան նոր օջախ ստեղծելու համար: Համաշխարհային քաղաքական կեանքի իւրաքանչիւր պատասխանատու մասնակից, պետութիւն, թէ միջազգային կազմակերպութիւն, համոզուած եմ, յստակ գիտակցում է այդօրինակ զարգացումների վտանգաւոր հետեւանքները: Բոլորիս յիշողութեան մէջ թարմ են ջիհադիստական աւազակախմբի կողմից Իրաքում ու Սիրիայում պետականակերպ միաւոր ստեղծելու ձգտումների հետեւանքների մասին յիշողութիւնները: Աշխարհի բոլոր պետութիւնները անելիք ունեն Թուրքիայի` Ատրպէյճանը Հարաւային Կովկասի ահաբեկչութեան որջ դարձնելու ծրագիրը ձախողելու գործում:
Հայաստանն ու Արցախն այսօր պայքարի առաջնագծում են, որովհետեւ արժանապատուօրէն ընդունել են մեզ նետուած մարտահրաւէրը: Ու մենք պայքարելու ենք մինչեւ վերջնական յաղթանակ: Սակայն սա միայն Արցախի եւ Հայաստանի խնդիրը չէ:
Որպէս իր անկախութեան համար պայքար մղող պետութեան նախագահ` կոչ եմ անում քաղաքակիրթ աշխարհին ակտիւ մասնակցութիւն ունենալ այս պայքարում: Համաշխարհային հակաահաբեկչական գործուն ու արդիւնաւէտ կոալիցիայի ստեղծումը օրուայ հրամայական է:
վստահ եմ` յաղթանակը մերն է լինելու»: