Արցախի ԱԳ նախարար Մասիս Մայիլեան գրառում կատարած է Ֆրանսայի Խորհրդարանի վերին պալատին կողմէն Արցախը ճանչնալու մասին ընդունուած բանաձեւին նկատմամբ.
«Ողջունում ենք Ֆրանսայի խորհրդարանի Վերին պալատի` Ծերակոյտի կողմից` 25 Նոյեմբերին Արցախի Հանրապետութիւնը ճանաչելու անհրաժեշտութեան մասին ընդունուած բանաձեւը: Խորին Երախտագիտութիւն ենք յայտնում ծերակուտականներուն եւ բոլոր անձանց ու կազմակերպութիւններին, որոնց ջանքերի շնորհիւ այս պատմական որոշման ընդունումը հնարաւոր դարձաւ:
Յատկանշական է, որ, ի թիւս այլ կարեւոր կէտերի, ընդունուած բանաձեւով Ծերակոյտը դատապարտում է Արցախի դէմ 27 Սեպտեմբերին սանձազերծուած ատրպէյճանա-թրքական ռազմական յարձակումը` ահաբեկիչ վարձկանների մասնակցութեամբ, եւ կոչ է անում Ֆրանսայի իշխանութիւններին գործադրել հնարաւոր բոլոր միջոցները` ապահովելու 1994 թ. հաստատուած սահմանների վերականգնումը, որոնք, ըստ էութեան, ամրագրուել են Արցախի Հանրապետութեան, Հայաստանի եւ Ատրպէյճանի կողմից ստորագրուած հրադադարի մասին եռակողմ անժամկէտ համաձայնագրով:
Կարեւորում ենք Ֆրանսայի Ծերակոյտի համարձակ դիրքորոշումը` կոչ անելու կառավարութեանը «Ճանաչել Լեռնային Ղարաբաղի Հանրապետութիւնը եւ այդ ճանաչումը դարձնել տեւական խաղաղութեան հաստատմանն ուղղուած բանակցութիւնների առարկայ»: Յոյսով ենք, որ Ծերակոյտի սոյն որոշումը կը ներշնչի նոյն բնոյթի եւ նոյն հզօրութեան բանաձեւերի ընդունմանը, նախ` Ֆրանսայի Ազգային ժողովում, ինչպէս նաեւ աշխարհի այլ երկրներում:
Մէկ անգամ եւս յայտարարում ենք, որ Արցախի դէմ զինուած յարձակումից, նրա տարածքների զգալի մասի ռազմական գրաւումից եւ կարգավիճակի հարցը քննարկելու Ատրպէյճանի հրապարակային հրաժարումից յետոյ վերանում է այլ պետութիւնների կողմից Արցախի Հանրապետութեան անկախութեան ճանաչմանը խոչընդոտող ցանկացած հանգամանք, որը մեծապէս պայմանաւորուած էր ատրպէյճանա-ղարաբաղեան հակամարտութեան խաղաղ կարգաւորման խանգարելու մտավախութեամբ:
Համոզուած ենք, որ Արցախի Հանրապետութեան միջազգային ճանաչման գործընթացը նաեւ համապատասխանում է ԵԱՀԿ Մինսքի խմբի համանախագահող երկրների, այդ թւում` Ռուսիոյ Դաշնութեան միջնաժամկէտ եւ երկարաժամկէտ շահերին:
Արցախի Հանրապետութեան անկախութեան միջազգային ճանաչումը բխում է արդարութեան եւ ժողովուրդների հաւասարութեան սկզբունքներից եւ կարեւոր ներդրում կ’ունենայ Հարաւային Կովկասում աւելի ամուր անվտանգութեան, կայունութեան եւ կանխատեսելիութեան ապահովման գործում»,գրած է ան:
