«Արմէնփրէս».- Ատրպէյճանական «Report» լրատուական գործակալութիւնը հերթական կեղծիք տարածած է, այս անգամ` Իտալիոյ անունով, յայտնելով, թէ Իտալիան Ատրպէյճանը հրաւիրած է Հռոմի G20 գագաթնաժողովին մասնակցելու: Հայաստանի Իտալիոյ դեսպանութեան գործերու ժամանակաւոր հաւատարմատար Ժիովաննի Նիկոլա Տիոնիսի յայտնեց, որ լուրը անհիմն է:
«Լուրերը թէ Իտալիան Ատրպէյճանը հրաւիրած է ներկայ գտնուելու G20 գագաթնաժողովին, անհիմն են, այդպիսի տեղեկութիւնները չեն տարածուած կամ հաստատուած», յայտնեցին դեսպանութենէն:
G20-ի այս տարուան գագաթնաժողովը 30-31 Հոկտեմբերին տեղի կ’ունենայ:
Անդրադառնալով Լեռնային Ղարաբաղի հակամարտութեան կարգաւորման հարցին նկատմամբ Իտալիոյ դիրքորոշումին, դեսպանութենէն յայտնեցին, որ Իտալիոյ Արտաքին Գործոց եւ Միջազգային Համագործակցութեան Նախարարութեան 11 Նոյեմբեր 2020-ի պաշտօնական յայտարարութեան մէջ յստակ օրէն ներկայացուած է ան: