ՀՅԴ Հայաստանի Գերագոյն Մարմինը 1 Մայիսին առիթով շնորհաւորական ուղերձ հրապարակած է. «Սիրելի՛ հայրենակիցներ, Այսօր 1 Մայիսն է` Աշխատանքի եւ աշխատաւորների միջազգային օրը: Իր յամառ ու ստեղծագործ աշխատանքով, յաղթահարելով աներեւակայելի մարտահրաւէրներ ու փորձութիւններ, հայը Հայրենիք ու պետականութիւն է կերտել, մեր ազգային կեանքի տարբեր ճակատներում յաղթանակներ կոփել: Աշխատանքը եղել եւ մնում է մեր համազգային բարօրութեան եւ պետականութեան ամրապնդման հիմնարար ուժը, արժանապատիւ ու մրցունակ երկիր ունենալու գրաւականը: Իսկ աշխատողների իրաւունքների պաշտպանութիւնն ու արժանապատիւ զբաղուածութեան ապահովումը պետութեան յանձնառութիւնն է. այդպիսին պէտք է լինի սոցիալական քաղաքականութեան իրական դրսեւորումը: Մեր հասարակութիւնն ու պետականութիւնը ծանր օրեր են ապրում: այնուամենայնիւ, համոզուած ենք, որ միասնական ուժերով կը կարողանանք դիմագրաւել փորձութիւնները, յաղթահարել պարտութեան ծանր հետեւանքները: Մենք վստահ ենք, որ միասին շատ շուտով կը կերտենք այն ազատ, արդար եւ համերաշխ հասարակութիւնը, ուր արժեւորուած են սոցիալական արդարութիւնը, տնտեսական զարգացումը, հանրային արդիւնքի արդար բաշխումը: Սիրելի՛ հայրենակիցներ, Շնորհաւորում ենք Աշխատանքի օրուայ` 1 Մայիսի կապակցութեամբ, մաղթում խաղաղ եւ ստեղծագործ աշխատանք` յանուն մեր հաւաքական երազանքների, յանուն մեր պետականութեան, յանուն մեր երաշխաւորուած ապագայի»:
