Հարաւային Կովկասի անցուդարձերը, յատկապէս Հայաստանի սահմանին ատրպէյճանական ուժերուն թափանցումը սովորական սանձարձակութեան սահմանները անցնելով, տարածաշրջանի ուժերու վերադասաւորման համար հետագայ լայնածաւալ պատերազմական գործողութիւններու մասին կը յուշեն:
Նոյն հաւանականութեան մասին կը խօսի ռուսական հեռահար զինատեսակներու տեղադրումը Արցախի մէջ՝ Հայաստանի սահմանին:
Միւս կողմէ Իրանի աւելի յստակ ու վճռական յայտարարութիւնները ի նպաստ Հայաստանի տարածքային ամբողջականութեան պահպանման եւ օտար ուժերու երկու երկիրներու սահմանին վրայ տեղադրման բացառման՝ նշաձողերը նոյն ենթադրութեան կողմ կը թեքեն:
Արեւմտեան երկիրներ Ատրպէյճանէն ուղղակիօրէն կը պահանջեն դուրս բերել իր ուժերը Հայաստանի տարածքներէն, այլապէս հարաւային Կովկասի մէջ արեւմտեան ուժերու կուտակում մը կրնայ նախատեսուիլ Հայաստանի պաշտպանութեան իսկ պատրուակով:
Ատրպէյճանը հրահրող հիմնական ուժերը կրնան ըլլալ Թուրքիան եւ Իսրայէլը: Թուրքիոյ այդ տարածքներու մերձաւորութեան արցախեան պատերազմի օրերուն ահաբեկիչներ կուտակելու ճիգերը այս օրերուն նախապատրաստումներն էին անկասկած: Աւելին. Թուրքիան Ատրպէյճանի եւ Նախիջեւանի միջեւ ուղղակի ճամբայ բանալով, հետագային, Ատրպէյճանի տարածքով բնականաբար պիտի փորձէ հասնիլ հիւսիսային Կովկասի թրքական երկիրներ եւ իրականացնել փանթուրքական իր երազը՝ ազդեցութեան գօտին ընդլայնելով ոչ միայն Հայաստանի, այլեւ տարածաշըրջանի տարբեր երկիրներու, յատկապէս Ռուսիոյ վրայ:
Իսրայէլ եւս Ատրպէյճանի անմիջական օժանդակութեամբ կրնայ Իրանի սահմանին վրայ անուղղակի վերահսկողութիւն հաստատել, եթէ Ատրպէյճանի սանձարձակութիւնները աննկատ մնան ու չդատապարտուին:
Հայաստանի եւ Ատրպէյճանի սահմանային տարածքները պաշտօնական վաւերագրերով հաստատելու եւ զանոնք պաշտպանելու հրամայականին առջեւ կը գտնուին հայրենի մեր երկիրը, պետութիւնը, որպէսզի այս միջոցին Ատրպէյճան քայլ առ քայլ Հայաստանի տարածք թափանցելու կարելիութիւն չունենայ ու հողեր չպոկէ արդէն իսկ փոքր մեր ածուէն:
Միւս կողմէ, Հայաստանի պաշտպանուածութիւնը կը բխի նաեւ Ռուսիոյ, Իրանի եւ տարածաշրջանին մէջ թրքական գործօնի ազդեցութիւնը զսպել ջանացող ուժերու շահերէն:
Այդ շահերուն համընկնումին եւ Իրանի հետ իր սահմաններու պաշտպանութեան մէջ մեծ դերակատարութիւն կրնայ ունենալ Հայաստանը: