«Երկիր».-9 Յունիսին ԱՄՆ պետքարտուղարի եւրոպական եւ եւրոսիական հարցերով տեղակալի պաշտօնակատար Ֆիլիպ Ռիքըր հանդիպում ունեցած է ՀՀ Արտաքին Գործոց Նախարարութեան մէջ:
Հանդիպումի ընթացքին ՀՀ եւ ԱՄՆ արտաքին քաղաքական գերատեսչութիւններու բարձրաստիճան պաշտօնեաները քննարկած են երկկողմ հետաքրքրութիւն ներկայացնող հարցերու լայն շրջանակ:
Յատուկ անդրադարձ կատարուած է ԼՂ հակամարտութեան կարգաւորման, հայ ռազմագերիներու եւ պատանդի կարգավիճակի մէջ գտնուող քաղաքացիական անձերու անյապաղ հայրենադարձումին, ինչպէս նաեւ` Ատրպէյճանի զինեալ ուժերու կողմէն ՀՀ ինքնիշխան տարածք ներթափանցման հետեւանքով ստեղծուած իրավիճակին:
Երկուստէք վերահաստատուած է ԵԱՀԿ Մինսքի խումբի համանախագահներու ձեւաչափի առանցքային դերակատարութեան շարունակականութիւնը ԼՂ հակամարտութեան կարգաւորման գործին մէջ: Կարեւոր համարուած է յառաջացած մարդասիրական հարցերու հասցէագրումը եւ Արցախ միջազգային մարդասիրական օգնութեան անարգել մուտքը:
Ամերիկեան կողմը շեշտած է Հայաստանի եւ Ատրպէյճանի սահմանին տիրող իրավիճակի լարուածութեան թուլացման անհրաժեշտութիւնը` վերահաստատելով ԱՄՆ պետքարտուղարութեան 27 Մայիսի յայտարարութեամբ ամրագրուած դիրքորոշումը առ այն, որ Ատրպէյճանի զինեալ ուժերը պէտք է ետ քաշուին 11 Մայիսի դրութեամբ գրաւած դիրքերէն:
Միտքեր փոխանակուած են նաեւ մարդու իրաւունքներու պաշտպանութեան եւ մարդկութեան դէմ յանցագործութիւններու կանխարգիլման օրակարգին շուրջ: Ընդգծուած է Հայոց Ցեղասպանութեան ճանաչման կարեւորութիւնը` որպէս ապագային նման յանցագործութիւնները կանխարգիլելու գործուն միջոց:
Քննարկուած է նաեւ ՀՀ-ԱՄՆ ռազմավարական երկխօսութեան ձեւաչափով իրականացուող հետագայ աշխատանքները: