«Թերթ».-Ատրպէյճանի մէջ Թուրքիոյ դեսպան Ճահիտ Պաղճըն այցելած է Արցախեան երկրորդ պատերազմի հետեւանքով Պաքուի վերահսկողութեան տակ անցած Շուշի քաղաք, որուն մասին պաշտօնեան գրած է իր թուիթըրեան էջին վրայ:
Ան յայտնած է, որ Շուշի այցելած է Թուրքիոյ նախագահ Էրտողանի այցելութեան ընդառաջ:
«Այսօր մենք կը շնչենք ազատ Ղարաբաղի օդը: Մենք կը հաստատենք, որ Շուշան (Շուշի) Ղարաբաղի սիրտն է ու Ատրպէյճանի դափնեպսակը»,գրած է դեսպանը` կից Շուշիի մէջէն առնուած լուսանկարներ հրապարակելով:
Աւելի ուշ Էրտողան յայտարարած էր, որ 15 Յունիսին Լեռնային Ղարաբաղի մէջ բանակցութիւններ պիտի վարէ Ատրպէյճանի նախագահ Իլհամ Ալիեւին հետ:
«15 Յունիսին Ալիեւի հետ մենք կ’ուղեւորուինք «ազատագրուած» (չակերտները` խմբ.) քաղաքներէն մէկը` Շուշա (Շուշի- խմբ․), ուր տեղի կ’ունենան պաշտօնական հանդիպումներ եւ տարբեր նախաձեռնութիւններ», ըսած էր Էրտողան:
Յիշեցնենք` Էրտողան պաշտօնական այցելութեամբ Ատրպէյճանի մէջ կը գտնուի 14-16 Յունիս:
Այցելութեան ընթացքին Ատրպէյճանի եւ Թուրքիոյ նախագահները 16 Յունիսին ներկայ պիտի գտնուին «Եւրօ-2020»-ի առաջնութեամբ Թուրքիոյ եւ Ուելսի ազգային հաւաքականներու ֆութպոլային հանդիպումին: