Ճակատամարտերու Յաղթող Մարդը
Երբ ան ճակատամարտի վայրը գնաց՝ ստուգելու համար բանակին մէջ գտնուող իր զինուոր եղբայրներուն վիճակը եւ անոնց տալու իր հօր՝ Յեսսէին կողմէ անոնց ղրկուած ուտելիքը, այնտեղ տեսաւ հեթանոս Գողիաթը, որ լկտիաբար կ’արհամարհէր ու կը նախատէր Կենդանի Աստուծոյ բանակը: Դաւիթ թէեւ երիտասարդ էր, բայց Աստուծմով զօրացած՝ կը յաղթէ Գողիաթին:
Այդ օրը, անիկա ոչ միայն կը սպանէ Փղշտացի Գողիաթը, այլեւ ճակատամարտի ընթացքին մասնակից կը դառնայ ժողովուրդը առաջնորդելու ընդդէմ հեթանոսներուն, ինչպէս նաեւ հալածելու զանոնք եւ ջախջախիչ յաղթանակ տանելու անոնց վրայ: Եւ այդ օրը վկայութիւնը կը դառնայ այն իրողութեան, թէ ինչպէ՛ս Տէրը Դաւիթին միջոցաւ փրկութիւն պարգեւեց իր ժողովուրդին:
Այս այն Դաւիթն է, որ իր կեանքին ընթացքին որոշ շրջան մը չար Սաւուղ թագաւորին կողմէ հալածուեցաւ: Քանիցս Սաւուղ ուզեց սպանել զինք, բայց չկրցաւ: Երբ Մեղքող Սաւուղին դուստրը Դաւիթին սիրահարած էր, թագաւորը ուզեց զայն ամուսնացնել Դաւիթին հետ, որպէսզի վերջինս հեթանոսներուն ձեռքը մատնէր (տե՛ս Ա.Թգ 18.17): Եւ այդ առիթով անոր պատուիրեց, որ հարիւր հեթանոս սպանէ եւ անոնց թլփատութիւնը իրեն բերէ եւ Դաւիթ հարիւրի փոխարէն երկուհարիւր հոգի սպանեց (տե՛ս Ա.Թգ 18.20-27): Այսպիսով Դաւիթ կրցաւ մեծ գործեր կատարել Իսրայէլի մէջ:
Դաւիթ Սաւուղ թագաւորէն փախչելով փղշտացիներուն մօտ կ’ապաստանի եւ Սիկելակի մէջ կը բնակի, եւ իր ընկերակիցներուն հետ պատերազմներու մասնակցելով յաղթական դուրս կու գայ (Տե՛ս Ա.Թգ 27):
Այս բոլորին մէջ մենք կը խօսինք Դաւիթ Մարգարէին մասին իբրեւ պատերազմի եւ պատերազմող մարդ, որ մեզի համար հոգեւոր պատերազմի օրինակ է: Որովհետեւ մենք այժմ Նոր Կտակարանին միջոցաւ կը հասկնանք Հին Կտակարանին մէջ տեղի ունեցող պատերազմները, որոնք աներեւոյթ սատանային, իր իշխանութեան եւ չար ոգիներուն դէմ պատերազմներ են:
Դաւիթ թագաւոր ըլլալէ ետք սկսաւ Աստուծոյ պատերազմները մղել եւ իր բանակին գլուխը անցած միշտ յաղթական դուրս եկաւ: Ան մեծամեծ նուաճումներ կատարեց, բազմաթիւ ազգեր իրեն ենթարկեց, եւ այն աստիճան երկիրը մաքրեց հեթանոսական պաշտամունքներէն, որ նոյնիսկ անձամբ յաղթեց այն ազգերուն, որոնց իսրայէլացիներ չէին կրցած յաղթել խոստացուած երկիր իրենց մտած ժամանակ, ու տիրացաւ անոնց ստացուածքներուն:
Այս բոլորին մէջ Դաւիթ ամենազօր Աստուծոյ մարդն էր, որուն մասին ըսուած է. «Դաւիթը, Յեսսէի որդին, սրտիս խօսող անձն է, որ ամբողջութեամբ իմ կամքս պիտի կատարէ» (Գրծ 13.22): Մարդ մը, որ Աստուծոյ կամքին համաձայն կը քալէ:
(շար.3)
Թարգմանեց`
Լեւոն Վրդ. Եղիայեան