Զինաթող պատերազմիկը
Անհրաժեշտ էր, որ Դաւիթ պատերազմի զէնքերը չլքէր, որովհետեւ ինք կը հանդիսանար գերագոյն օրինակը, առաջնորդը, Աստուծոյ մարդը եւ Տիրոջ օծեալը: Աստուած զինք էր, որ ընտրեց եւ ժողովուրդին վրայ իբրեւ օծեալ թագաւոր եւ առաջնորդ կարգեց: Եւ ահաւասիկ Աստուծոյ մարդը, ժողովուրդի առաջնորդը եւ պատերազմիկներուն պետը ինքզինք զինաթափ կ՛ընէ. եւ ասիկա մեծագոյն սխալն էր, որ տեղի ունեցաւ Դաւիթ մարգարէի կեանքին մէջ:
Գուցէ մէկը ըսէ, որ Դաւիթին կեանքի մեծագոյն մեղքը անոր շնութեան մէջ իյնալն էր եւ անկէ յառաջացող հետեւանքները: Սակայն, իրականութեան մէջ, մեղքի բանալին կամ մեղքի առիթ տուող երեւոյթը ուրիշ բան չէր եթէ ոչ՝ ինքնիրեն մտածելը, որ ինք արդէն բաւարար պատերազմած է, ուստի պէտք է որ հիմա հանգիստ ընէ:
Մինչ բանակը կը պատերազմէր, Դաւիթ պալատին մէջ անգործ ու պարապ մնացած էր: Իր զինուորները պատերազմի դաշտ գացին, որպէսզի կռուին եւ իրենց արիւնը թափեն Դաւիթի եւ անոր թագաւորութեան համար, սակայն ինք պալատին մէջ մնաց, որպէսզի հանգիստ ընէ ու վայելէ:
Պատերազմէն յիշատակներ
Ո՞ւր է այն Դաւիթը, երբ առիթով մը սաստիկ ծարաւցած էր եւ խմելու ջուր չկար, իր մարդոցմէ երեք զօրաւորներ ճեղքելով թշնամիին սահմանը անցան, Բեթլեհէմի ջրհորէն ջուր քաշելով ուրախութեամբ բերին, որ Դաւիթը խմէ, իսկ ան հետեւեալը ըսաւ անոնց՝ ինչպէս խմեմ այս ջուրը, երբ ինծի համար վտանգի ենթարկած ձեր կեանքին գինով բերած էք զայն, եւ ջուրը գետին թափեց, որպէս Տիրոջ մատուցուած ընծայ, ըսելով՝ ասիկա ինծի համար չէ, այլ՝ Տիրոջ (տե՛ս Բ.Թգ 23.15-17): Ա՛յս է նախկին Դաւիթը, իսկ ներկայ Դաւիթը իր պալատը քաշուած՝ իր զինուորներուն կեանքը վտանգի կ’ենթարկէ, վախնալով որ գուցէ պատերազմի ընթացքին սպանուի:
Քնացած (հոգեպէս) ժամանակ Թշնամին կը յարձակի իր վրայ
«Օր մը՝ իրիկուան դէմ՝ Դաւիթ իր անկողինէն ելլելով պալատին տանիքին վրայ կը պտըտէր: Տանիքին վրայէն կին մը տեսաւ, որ կը լուացուէր: Այն կինը տեսքով խիստ գեղեցիկ էր: Եւ Դաւիթ մարդ ղրկեց ու այն կնոջ համար հարցուց: Մէկը ըսաւ. «Ասիկա Քետացի Ուրիային կինը, Էլիամին աղջիկը, Բերսաբէն է»: Դաւիթ պատգամաւորներ ղրկեց ու զանիկա կանչեց: Երբ կինը անոր եկաւ, Դաւիթ անոր հետ պառկեցաւ: Անիկա իր անմաքրութենէն դեռ նոր մաքրուած էր: Ետքը կինը իր տունը գնաց»(Բ.Թգ 11.2-4):
Կը տեսնենք, թէ ինչպէս Դաւիթ իրիկուան դէմ, երբ տակաւին մութը չէր կոխած ան իր պալատին տանիքը բարձրացած կը դիտէ չորս դին եւ յանկարծ աչքը կ’իյնայ դրացիին մերկ կնոջ վրայ, որ կը լոգնար: Դաւիթին կիրքն ու ցանկութիւնը եռալով՝ անյաղթահարելի զօրութեամբ կարծէք կ’իշխեն իր վրայ: Երբ մարդ արարածին վրայ կիրքը տիրէ, ան կը կորսնցնէ իր ուղիղ դատողութիւնն ու հաւասարակշռութիւնը: Եկեղեցւոյ Հայրերը կ’ըսեն. «Ագռաւը երբ հաւը, թռչունը կամ անոր ձագը կ’որսայ եւ ուտել կ’ուզէ, անոր առաջին գործը կ’ըլլայ որսին երկու աչքերը կտցահարել, որպէսզի անիկա իր տեսողութիւնը կորսնցնէ եւ այդպիսով դիւրին որս մը կ’ըլլայ»:
Նոյնպէս ալ սատանան կը վարուի մարդուն հետ: Ամէն բանէ առաջ ան մարդուն հոգեւոր տեսողութիւնը կը կուրցնէ, այլ խօսքով՝ այնպէս կ’ընէ, որ մարդ չարութիւնը իբրեւ սիրելի եւ շատ գեղեցիկ բան մը տեսնէ, եւ երեւոյթները այնպիսի զարդարանքով եւ հրապոյրով կը ներկայացնէ, որ մարդ կը խաբուի տեսնել ճշմարտութիւնը…:
(շար.5)
Թարգմանեց`
Լեւոն Վրդ. Եղիայեան