ՀՄԸՄ-ի Հալէպի Մասնաճիւղի «Շաւարշ Քրիսեան» տարեկան բանակումը տեղի ունեցաւ 9-15 Օգոստոս 2021-ին, ՀՄԸՄ-ի բանակավայրէն ներս, մասնակցութեամբ 145 քոյր-եղբայրներու։ Բանակումը ընթացաւ մտերմիկ եւ ջերմ մթնոլորտի մէջ։ Հոն սկաուտները զինուեցան տեսական եւ գործնական նոր գիտելիքներով։ Յայտագիրը կ’ընդգրկէր հետախուզական արշաւներ, դասախօսութիւններ, ձեռային աշխատանքներ, երգի ուսուցում, բանակումի կարգ ու կանոն, պտոյտ դէպի ծով եւ խրախճանքներ։
Կիրակի, 15 Օգոստոս 2021-ին, Ս. Աստուածածնայ Վերափոխման Տօնի Առիթով սկաուտները մասնակցեցան Խաղողօրհնէքի արարողութեան, ապա տեղի ունեցաւ ՀՄԸՄ-ի Սուրիոյ Շրջանային Վարչութեան կազմակերպած աւանդական տողանցքը, ուր սկաուտները շեփորախումբին ընկերակցութեամբ տողանցեցին դէպի Համալիր։ Այնտեղ, սրբազան հայրը ողջունեց բոլոր ՀՄԸՄ-ականները եւ բարի երթ մաղթեց անոնց։
Իսկ Կիրակի, 15 Օգոստոս 2021-ին, երեկոյեան ժամը 7։30-ին, Քեսապի բանակավայրին մէջ տեղի ունեցաւ ՀՄԸՄ-ի Հալէպի Մասնաճիւղի «Շաւարշ Քրիսեան» տարեկան բանակումի խարուկահանդէսը։
Խարուկահանդէսին ներկայ գտնուեցան Բերիոյ Հայոց Թեմի Բարեջան Առաջնորդ Գերշ. Տ. Մասիս Սրբ. Եպս. Զօպուեան, Սուրիոյ Հայ Աւետարանական համայնքի Պետ Վերապատուելի Դոկտ. Յարութիւն Սելիմեան, ՀՄԸՄ-ի Կեդր. Վարչութեան անդամ եղբ. Մանուկ Քէօշկէրեանը, Ազգային Կեդրոնական Վարչութեան անդամը, Պատկան Մարմինի անդամներ, ազգային մարմիններու ներկայացուցիչներ, ՀՄԸՄ-ի Սուրիոյ Շրջանային վարչութեան անդամ եղբ. Կարօ Գալայճեան, ՀՄԸՄ-ի Սուրիոյ Շրջանային Սկաուտ խորհուրդն ու խմբապետութիւնը, ՀՄԸՄ-ի Հալէպի Մասնաճիւղի Վարչութեան անդամ եղբ. Ալեքսան Պալեան, ՀՄԸՄ-ի Քեսապի եւ Լաթաքիոյ մասնաճիւղերու վարչութիւններն ու սկաուտ խորհուրդները, հալէպահայ միութիւններու եւ հաստատութիւններու ներկայացուցիչներ, ծնողներ եւ հրաւիրեալներ:
ՀՄԸՄ-ի շեփորախումբը բանակավայրէն ներս հնչեցուց Սուրիական եւ Հայաստանի քայլերգները, ապա արտասանուեցան հայերէն եւ արաբերէն բացման խօսքերը։
Շաւարշ Քրիսեանի ծննդեան 135-րդ ամեակի առիթով սկաուտները եռագոյն դրօշներով ներկայացուցին բացման պատկեր, ապա քոյրերն ու եղբայրները հանդիսատեսներուն ներկայացուցին բուրգ, չափական մարզանք, գաւազանով մարզանք, հայկական եւ արաբական պարեր։
Օրուան բեմավարը հրաւիրեց Սկաուտ խորհուրդի ատենապետ եղբ. Աբիկ Խաչոյեանը հովանաւորելու համար փոխ խմբապետ եւ վարիչ առաջնորդ աստիճաններու տուչութիւնը, որ տեղի ունեցաւ մասնաճիւղի խմբապետ եղբ. Յակոբ Ուրիշիկեանի ձեռամբ։
Խարուկահանդէսի աւարտին սրբազան հայրը շնորհաւորեց ներկաները Աստուածամօր Վերափոխման տօնին առիթով, ապա յայտնեց, որ խարուկահանդէսի ընթացքին բոլոր ներկաները վկաները դարձան ՀՄԸՄ-ի նուիրական առաքելութեան։ Տէր Մասիս աւելցնելով ըսաւ, որ մեր պարտքն է յարգել յիշատակը այն հիմնադիրներուն, որոնք հիմը դրին այս միութեան, որպէսզի եկեղեցւոյ կողքին ըլլայ նաեւ այնպիսի ուժ մը, որ կարենայ երիտասարդները համախմբել մեր եկեղեցական եւ ազգային արժէքներուն շուրջ։ Ան շեշտեց, որ ՀՄԸՄ-ը միշտ կանգուն է իր երիտասարդ ուժերով, որոնք մաքուր նկարագրով եւ ծառայութեան ոգիով տէր կը կանգնին մեր նուիրական արժէքներուն։ Աւարտին, սրբազան հայրը աղօթք բարձրացուց առ Աստուած եւ խնդրեց Ամենակալէն, որ պահէ մեր Սուրիական Հայրենիքը, Հայաստանն ու Արցախը, ինչպէս նաեւ ՀՄԸՄ-ի մեծ ընտանիքը։
Խարուկահանդէսէն ետք, սկաուտները շրջանակ մը կազմելով երգեցին Հրաժեշտի երգը՝ յաջորդ տարի դարձեալ հանդիպելու յոյսով։
Նայիրի Ազարիկեան-Արոյեան