«Մատաղ» հայերէն բարդ բառ մըն է, որ մեծ հաւանականութեամբ ծագած է գրաբարեան «մատոյ աղ» բառակապակցութենէն, որ ըստ Գ. Տաթեւացիին կը նշանակէ «մատուցէ՛ աղ»։ Ըստ այսմ «մատաղօրհնութիւն»ն ալ կը նշանակէ՝ մատուցուած աղի օրհնութիւն։
Քրիստոնէութեան պետական կրօն հռչակուած օրերէն արդէն հաստատուած է մատաղի կարգը Ս. Գրիգոր Լուսաւորիչին կողմէ, երբ Սուրբ Պատարագէն ետք միասին կը հաւաքուէին «Սիրոյ ճաշին»՝ մատաղին շուրջ, որ ամբողջութեամբ կը մատուցուէր հիւանդներու, աղքատներու եւ կարիքաւորներու:
Մատաղը կ’ըլլար երախտագիտութիւն յայտնելու Աստուծոյ ամէն տեսակի չարիքներէ եւ փորձութիւններէ մարդկութիւնը ազատած ըլլալուն համար:
Մատաղին նիւթերը եղած են կենդանին ու աղը: Նախ պէտք էր օրհնել մատաղին աղը եւ ետքը զայն տալ կենդանիներուն, այնուհետեւ միայն կարելի կ’ըլլար մորթել կենդանին:
Աղը մաքրութեան օրինակ էր, ինչպէս որ Քրիստոս ըսաւ իր աշակերտներուն. «Դուք էք երկրին աղը» եւ որովհետեւ Ադամի մեղսագործութեամբ մարդկութիւնը անէծքի տակ ինկաւ եւ պղծուեցաւ, ուստի աղը օրհնելով պէտք է մաքրուի ան, ապա զայն կենդանիին բերանը լեցնելով պէտք է մաքրէ նաեւ կենդանին: Կենդանիները կրնան ըլլալ խոյը, արջառը, աքաղաղը կամ աղաւնին եւ ընդունուած կարգ էր մատաղ ընել միայն արու կենդանիները:
Մատաղը կը խորհրդանշէ ննջեցեալներու յիշատակը, փրկութեան յոյսը, ողորմութիւնը եւ աղքատասիրութիւնը, հետեւաբար ընդունելի մատաղներ են նաեւ հացեղէն, ուտեստեղէն, հագուստեղէն, դրամական նուիրատուութիւններ կամ որեւէ այլ բարեգործութիւններ:
Մատաղը չենք կրնար իրականացնել Չորեքշաբթի, Ուրբաթ օրերը՝ շաբաթապահքերուն, ինչպէս նաեւ Մեծ Պահքի շրջանին:
Արգիլուած է մատաղացու կենդանին եկեղեցի մտցնել, վասնզի եկեղեցին դրախտի խորհուրդ ունի, այնտեղ անասուն պէտք չէ մտցնել:
Մարդիկ յաճախ չհասկնալով մատաղին իմաստը եւ նշանակութիւնը մատաղացու կենդանիին արիւնը կը քսեն իրենց տան դրան կամ իրենց ճակատներուն ու ձեռքերուն: Այս արարքը հեթանոսական է եւ իմաստէ զուրկ: Մեր ճակատները կ’օծուին Ս. Միւռոնով մկրտութեան ժամանակ, իսկ անոր վրայ կենդանիի արիւն քսելը կը նշանակէ ետդարձ հեթանոսական ծէսերու: Մատաղի միսը կարելի չէ նաեւ պահել իբրեւ ուտելիք, այլ պէտք է նոյն օրն իսկ բաշխել աղքատներուն եւ ճաշակել մայրամուտէն առաջ:
Մատաղի կենդանին պէտք է մորթուի հաւատացեալ աշխարհական տղամարդու կողմէ: Կենդանիին փորոտիքը, գլուխը եւ այլ մնացորդները պէտք է թաղել, որպէսզի շուներու եւ կատուներու կեր չդառնան, քանզի օրհնուած են:
Այսպիսով մատաղը խորապէս մարդասիրական արարողութիւն մըն է, որ կարելիութիւն կու տայ հաւատացեալներուն ողորմութիւն ցուցաբերելու եւ օգնելու աղքատներուն ու կարօտեալներուն:
Մեծ խանդավառութեամբ հայորդիք ամէնուրէք կը նշեն մատաղօրհնէքի սովորոյթը, զայն սերմանելով նոր սերունդներուն մէջ, որպէս արժանաւոր ժառանգորդներ հայկական եկեղեցւոյ, որ միշտ ամրակուռ բերդ մը հանդիսացած է ազգային ինքնութիւնը խաթարող եւ մշակութային արժէքները ապականող հոսանքներուն դիմաց:
Անի Մինասեան