Սատանան հանգուցող է
Սուրբ հայրերը կ’ըսեն, թէ «Սատանան հանգուցող է, դուն անոր պարանները կը տրամադրես, ինք ալ կը հանգուցէ»… Քանիցս սատանան մարդը կը խաբէ՝ ըսելով, քանի որ մեղք գործեցիր եւ ատիկա քեզի մեղք համարուեցաւ, ուրեմն ամբողջացուր զայն մինչեւ վերջ: Եւ այս էր որ պատահեցաւ Դաւիթի պարագային, երբ կատարուածը տարբեր փուլ թեւակոխեց: Ապօրինի կենակցութենէն ետք, երբ Բերսաբէ տուն գնաց եւ անդրադարձաւ որ յղի է, անմիջապէս Դաւիթ թագաւորին լուր ղրկեց իր յղութեան մասին: Եւ Դաւիթ մտածեց, թէ ի՛նչ պէտք է ընէ եւ ինչպէ՛ս ծածուկ պէտք է պահէ իր գործած մեղքը:
Թզենիի տերեւներով ծածկուելու փորձ
Դաւիթ պատերազմի դաշտէն կանչել կու տայ Բերսաբէի ամուսինը՝ Քետացի Ուրիան, եւ անիկա իր զինուորական զգեստով կը ներկայանայ: Դաւիթ անոր կ’ըսէ, որ քեզ կանչեցի, որովհետեւ լսեցի, որ երկար ժամանակէ ի վեր տունդ ձգած կռուի դաշտ կը գտնուիս: Ուստի, տունդ գնա՛ եւ քիչ մը հանգստացի՛ր եւ ապա կը վերադառնաս պատերազմի դաշտ:
Սակայն Քետացի Ուրիան, որուն սիրտը իր ժողովուրդին նախանձախնդրութեամբը լեցուած էր, տուն չգնաց, այլ թագաւորին պալատին դրան առջեւ քնացաւ, անոր ծառաներուն հետ միասին: Երբ Դաւիթ հարցուց թէ ինչո՛ւ տուն չգացիր, Ուրիան պատասխանեց՝ ըսելով. «Տապանակը, Իսրայէլն ու Յուդան վրաններու մէջ կը նստին եւ իմ տէրս Յովաբն ու իմ տիրոջս ծառաները բաց դաշտի մէջ կը բնակին, ես ուտելու ու խմելու եւ կնոջս հետ պառկելու համար իմ տո՞ւնս երթամ: Դուն կենդանի ես ու քու հոգիդ կենդանի է, որ ես այդ բանը չեմ ըներ» (Բ.Թգ 11.11): Քետացի Ուրիան շնորհակալութիւն յայտնեց Դաւիթ թագաւորին եւ չընդունեց հանգստանալ, թերեւս ալ անոր ըսաւ, որ Թագաւոր իմ, դուն ժամանակին մեզ այդպէս ընել չես սորվեցուցած:
Դաւիթ չյաջողեցաւ իր խաբէութեան մէջ, որուն միջոցաւ ուզեց ծածկել իր մեղքը ինչպէս իր նախահայրը՝ Ադամ ուզեց թզենիի տերեւով ծածկել իր մերկութիւնը:
Իսրայէլի ողջ ժողովուրդը կը տեսնէր պատահածը, եւ բնականաբար հարցը շատ աւելի մեծցաւ Դաւիթին համար, որովհետեւ եթէ խաբէութիւնը յաջողէր ու երբ բացայայտուէր Բերսաբէի յղութիւնը, մարդիկ պիտի չմտածէին որեւէ շնութեան կամ պոռնկութեան մասին, բայց հիմա, յայտնի պիտի ըլլար, թէ ինչո՛ւ Դաւիթ կնոջ ամուսինը կանչել տուաւ պատերազմէն:
Դաւիթ փորձ մըն ալ կը կատարէ եւ կ’ուզէ, որ Քետացի Ուրիան տուն երթայ հանգիստ ընելու, սակայն վերջինս անգամ մը եւս տուն չերթալով թագաւորին պալատին աստիճաններուն վրայ կը քնանայ: Դաւիթ կը տեսնէ, որ հարցը շատ աւելի տեսանելի պիտի դառնայ, եթէ կնոջ ամուսինը ամիս մըն ալ այդտեղ մնայ: Ուստի կը ղրկէ զայն եւ հարցը լուծելու ուրիշ կերպերու մասին կը մտածէ:
Լեւոն Վրդ. Եղիայեան