Աստուածածնի կենսագրութեան եւ կեանքին մասին տեղեակ կ’ըլլանք սրբազան աւանդութեան ճամբով: Եկեղեցին յատուկ տեղ վերապահեց աւանդութեան, որ սերտ առնչութիւն ունի փրկութեան ծրագիրին հետ եւ լրացուցիչ մասը կը կազմէ առաքելական քարոզութեան: Հարկ է նկատի առնել, թէ աւանդութեան ընդմէջէն ոչ միայն պատմական եղելութիւնները կամ աւանդազրոյցները հարազատութեամբ փոխանցուեցան գալիք սերունդներուն, այլ նաեւ բարեպաշտական սովորութիւններ պահպանուեցան: Այլապէս մանկամկրտութիւնը, խաչակնքելը, մոմավառութիւնը, Աստուածամայրը մեծարելը…եւ այլն ժամանակաւոր ընթացք առնելով՝ մոռացութեան պիտի մատնուէին: Ահա թէ ինչո՛ւ հնագոյն հոգեւոր գրականութեան զուգահեռ աւանդութիւնն ալ նուիրականացած եւ դարձած է եկեղեցւոյ կեանքէն ընդմիշտ անբաժան: Այս իրողութեան ցայտուն օրինակը կը տեսնենք Պօղոս առաքեալին հետեւեալ խօսքերուն մէջ.«Ամուր պահեցէք աւանդութիւնները որ սորվեցաք մեզմէ, ըլլա՛յ խօսքով, ըլլա՛յ նամակով»(Բ.Թս 2.15):
Ս.Կոյս Մարիամ Դաւիթի ցեղէն էր.Յովակիմի եւ Աննայի միակ զաւակը: Աննա ամուլ էր: Աղօթքով եւ ուխտով յղացաւ եւ Աստուած իրեն պարգեւեց Մարիամը, որ կիներուն մէջ օրհնեալ պիտի ըլլար եւ Տիրամայր ըլլալու մեծ կոչումը պիտի ստանար: Հայ եւ Յոյն եկեղեցիները Ս.Աննայի յղացման տօնը կը կատարեն 9 Դեկտեմբերին: Աննա եւ Յովակիմ աստուածավախ էին, բարին ակնկալելով եւ յոյսին կառչելով Տիրոջ նկատմամբ մշտապէս վստահութիւն կը ցուցաբերէին: Այլ խօսքով՝ առաքինի վարքով Աստուծոյ հաճութիւնը շահած էին:
Այսպիսի պատուական ծնողքի մը ամուսնական կեանքին «Քաղցրահամ պտուղ»ը եղաւ Ս.Կոյս Մարիամը, որ բարոյական մաքրութեամբ, աղօթասիրութեամբ եւ հեզութեամբ յատկանշուելով` բարի եւ շնորհալի նկարագիր ունեցաւ:
Հին ժամանակ ամօթալի երեւոյթ եւ նոյնիսկ նախատինք կը համարուէր անզաւակութիւնը: Օրէնքին համաձայն արգիլուած էր եղբօր կնոջ հետ ամուսնանալը (Հմմտ Ղեւ 18.16), բայց յատուկ թոյլտուութիւն կը տրուէր միայն այն պարագային եթէ մահացած եղբայրը սերունդ չէ ունեցած, որպէսզի ծնելիք անդրանիկ զաւակը մահացած եղբօրը զաւակը նկատուի (Հմմտ Բ.Օր 25.5-10)։ Բնականաբար այս տնօրինումները ժամանակաւոր եղան եւ նոր Ուխտին շնորհիւ Նոր կարգեր հաստատուեցան:
Աստուած լսեց Աննայի եւ Յովակիմի խնդրանքը: Մարիամի ծնունդը ապացոյց էր թէ աղօթքները անպատասխան չեն մնար: Մենք յաճախ կը կարծենք թէ մեր ծրագիրն է օգտաշատը եւ շահեկանը, մինչդեռ Աստուծոյ ժամկէտը բարիին նպաստող է եւ օրհնութեան միջոց: Մարիամ ուխտի զաւակ էր: Աննա եւ Յովակիմ Տիրոջ հանդէպ երախտապարտ գտնուեցան եւ իրենց զաւակը Տաճար նուիրեցին այն հասակին՝ երբ ան այլեւս կարող էր ծնողքէն անջատ ապրիլ:
Աննա եւ Յովակիմ ընտանեկան սրբութեան խօսուն օրինակը կը հանդիսանան: Անոնց ամուսնական կեանքին ընդմէջէն սրբութեան շող ճառագայթեց եւ հաւատքի կանչը արձագանգեց:
Այսօր որեւէ ժամանակէ աւելի անմիջական կարիքը կայ պատուելու ամուսնական կեանքը: Կ’ապրինք տագնապահար աշխարհի մը մէջ: Վախն ու վտանգը ընդհանրացած են: Մեղքն ու մոլութիւնը տարածուած են: Եթէ ընտանեկան սրբութեան ջահը մշտավառ է՝ ընտանիքը կրնայ փրկուիլ չարէն: Աննայի եւ Յովակիմի կեանքէն կը սորվինք Աստուծոյ վստահիլ: Այսինքն հաւատալ, թէ մեր երկնաւոր Հայրը Իր փրկարար միջամտութեամբ մեզ կ’առաջնորդէ դէպի «խոտաւէտ արօտներ» եւ «խաղաղութեան նաւահանգիստ»:
Երջանկութեան եւ երանութեան բանալին տան սրբութիւնն է, առանց որուն կարելի չէ պատկերացնել օրհնաբեր, խաղաղ եւ սիրով արմատացած ընտանեկան յարկ:
Աննայի եւ Յովակիմի օրինակով եւ օրհնութեամբ թող շէն մնան հայ ընտանիքները:
Խորէն քհնյ. Պէրթիզլեան