Հայ արդարադատ մարտիկներու այս տեսակը ինքնասիրութենէ չի տառապիր։ Նմաններուն անձնուրացութիւնը պիտի չարտօներ զիրենք, որ պճնանքի եւ նարկիզանութեան վերածէին իւրաքանչիւր կենաց, իւրաքանչիւր լուսանկար, դիմատետրի իւրաքանչիւր լորձնաշուրթն գովասանք։
Անոնք հաստատապէս կը գիտակցին, որ երեւելի մարտունակ օղակն են անքակտելի, ամրակուռ շղթային: Անոնք են, որ «Նեմեսիս»ը ընդունեցին որպէս դաստիարակիչ օրինակ եւ Հայ Դատի համար պայքարի ամէն եղանակ ու գործելաոճ դարձաւ կենսական նշանացոյց։ Հետեւաբար տարօրինակ չէ այս տարերային խնդութիւնը, որ կ’ապրինք ամէնուրեք՝ հերոսներ ներբողելով եւ քովքը հիւսելով անոնց սխրագործութեան։ Ան արդիւնք է գերհրճուածութեան, երկա՜ր տարիներու սպասումի եւ կարօտախտի ցայտաղբիւրի ուժեղ ժայթքումին, կազմելով ամբասիր սրտակցութեան մը խօսուն պատկեր։ Ճիշդ այդ մէկուն համար, նոյնիսկ այն սերունդը, որ Համբիկին արարքին օրը չէր ծնած, այսօր, նոյն խանդով ու ոգեւորութեամբ, ամուր գրկեց զինք որպէս իր էութեան հարազատ մասնիկը։
Պատի՛ւ բոլորին, պատկերազարդ կաւճէ մատիտով հերոս մարմնաւորող փոքրիկին, դողդոջուն մատներով զօրակցական նամակ գրող պատանիին-պարմանուհիին, իր լումայով սատարող բարերարին, պաշտպան կամաւոր յանձնախումբերուն եւ փաստաբաններուն ազնիւ ճիգերուն, եւ անխտիր բոլոր հայորդիներուն, որոնք 38 տարիներու վրայ երկարած անդուլ եւ հետեւողական յարաբերական առօրեայ գործ տարին քաղաքական բանտարկեալ Սասունեանի ազատ արձակման համար։ Գալով «վարկ շահելու» դիտարկման աժան փորձերուն, միայն մեր ներքին ճակատը պառակտելու հաշուոյն հնչող անտեղի զգօնութեան յորդորներ են։ Վերջին հաշուով ամէն հայորդի իր գիտցած ձեւով ու հասունութեան մակարդակով կ’արտայայտէ իր խնդութեան զգացումները՝ չափաւոր կամ զեղուն պատկերներով։ Վարկ շահողը համայն ազգն է եւ պատիւը կը պատկանի անտարակոյս՝ բոլոր արի մարտնչողներուն, որոնք զուլալ ջուրով ոռոգեցին «Ծիրանի Ծառը»։ Իսկ «տպաւորութիւն ձգելու շահարկումները»՝ անյարիր են գաղափարական արմատներէ սնանած հայուն, որ գիտէ պահանջել ի հարկին ցուցաբերել սառնասրտութիւն ու խոհականութիւն, իսկ ի հարկին ծառանալ՝ յանուն գաղափարի անաղարտութեան։
Աջ ու ահեակէն հնչած թելադրանքներու հասցէատէրերը թող խնայեն իրենց յորդորի ճիգերը եւ բոլոր անոնց որոնք հանդէս կու գան «խոնարհ հոգածութեամբ վարուելու» Համբիկի օրինակին հետ՝ պիտի յարենք, որ հայ հասարակութեան գիտակից մասսան՝ իր առողջ բնազդով, շատ լաւ գիտէ ո՞վ ինչ է եւ յարդը ցորենէն լաւ գիտէ զանազանել։ Հետեւաբար Համբիկի ազատ արձակման վերնագիրին տակ այսպէս ըսուած «շահարկումները» սեփական կեանքի գնով ճամբայ կտրողներուն վարքը չէ։ Պէտք է յստակ դիտարկենք, որ միակ մտահոգուողը դրածոներն են, որոնք կը մերժեն դրական որեւէ յառաջխաղացք եւ իրենց ժխտական վարքով ուղղակի ջուր կը լեցնեն Թուրքիոյ անհանգստութեան ջաղացքին: «Քաւոր Պետրոս»ի յետնորդները, հայանուն քաղաքական փերեզակներն են ու ազգի տզրուկները: Անոնք նախատիպարն են Վեստ Սարգիսի, որոնց մօտ ո՛չ ազգը, ո՛չ հայրենիքը բարոյական արժէք մը ունին։ Այսօրերու խաչագողերու տրամաչափի մակարդը այդ օրինակներուն մէջ կ’ապրի ու կ’ուռճանայ՝ դառնալով հողատու եւ հայրենիքի դաւաճան։
Հայրենի հողի ջերմութիւնը չվայելելով ոտքերնուն տակ, սփիւռքեան հարիչ յորձանուտին մէջ, պաղ մայթերու վրայ «բուքին-բորանին եւ մութ գիշերին» հասակ առած Համբիկի սերունդին իրանը նուազագոյնը պէտք է հայրենասիրական անկեղծ ջերմութեամբ, ամրօրէն փաթթել, եթէ նոյնի՛սկ իրենց բազուկներու սխրագործութիւնը պանծացնելու կոչուած այդ հարազատութիւնը միջազգային քաղաքակիրթ հանրութեան արժեհամակարգին համար «քաղաքական անյարիր քայլ» դասուի։
Համբիկ իր խուցին մէջ առանձին չէր եւ «դուրսի խենթերուն» անձնդիր նեցուկով, արդարութեան ոդիսականը հալածող յարալէզներու յորդարատ լորձունքներով քակտեց քաղաքական բռնազբօսիկ շղթան, խոհականութեամբ՝ իր պայծառ աւարտին հասցնելով շատ նուրբ կացութիւն մը, ի հեճուկս թրքական ՄԻԹ-ի արգելակիչ հետեւողական սադրանքներուն։
Աւելին. նողկանք կ’ապրինք ականատեսը ըլլալով զանգուածի մը, որուն մաս կազմող հայ մարդիկ կը համարձակին ըսելու՝ «թքած ունենք Համբիկ Սասունեանի կորսուած կեանքի վրայ»: Վահագն Դաւթեան նմանները նզովելու իրաւունքը ունի երբ կ’ըսէ.
«Ողջ լինես, Գուսա՛ն,
Որ քո շանթակերպ, ճշմարիտ խօսքով
Շանթես յաւիտեան այդ Վեստ Սարգիսին
Ու մնացեալին… Մեղայ, տէ՜ր, մեղայ…»:
Համբիկներու երեւոյթը արգասիքն է 70-80 թուականներու ՅԵՂԱՓՈԽԱԿԱՆԱՑՈՒՄ – ՔԱՂԱՔԱԿԱՆԱՑՈՒՄին, որուն սաղմատունէն ծնաւ գաղափարական մարտիկներու փաղանգ մը, յանձն առնելով՝ գրիչով, ցուցական աքտերով փշրել լռութեան շղթան, ստեղծելով Հայ Դատի պահանջատիրութեան իրաւացիութեան շուրջ միջազգային հանրային կարծիքի ուշագրաւ հետաքրքրութիւն։ Աւելի ուշ, այդ հետաքրքրութեան առանցքը միս ու ոսկոր ստացաւ եւ իրաւական զանազան դրսեւորումներով եկաւ հաստատելու հայ ժողովուրդի հանդէպ շղթայազերծուած մշակութային ու ֆիզիքական ցեղասպանութեան արհաւիրքին տարողութիւնը, որուն միակ պատասխանատուն թրքական պետութիւնն է։
Այսպէս, իրերայաջորդ օտարազգի կառավարութիւններ, պետութիւններ ու քաղաքական եւ միջազգային ականաւոր անձնաւորութիւններ՝ իմա՛ թուրք հասարակական գործիչներ, հերձելով ուրացումի քօղը, ընթացք տուին պատմական անհերքելի իրողութեան: Մնաց թրքկական պետութիւնը, որ իր կարգին հրաժարելով ուրացումի քաղաքականութենէն՝ քաջութիւն պէտք է ունենայ, առերեսումի պատմական պահուան եւ ճշմարտութեան հետ, եւ որպէս ժառանգորդը երիտթուրքերու գահին, ընդունի հայ ժողովուրդի իրաւունքներու անժամանցելիութիւնը, հաստատելով արդար վնասուց հատուցման ճանապարհի քարտէզ՝ հայապատկան հայրենի հողի վերադարձով։ Միայն այն ատեն նաե՛ւ պիտի հանգչին Լիզպոնի նահատակներուն աճիւնները եւ ոգին մեծ փաղանգի բոլոր անյայտ գաղափարական մարտիկներուն, որոնք ծաւալեցին նորօրեայ ասպետականութիւն, դրոշմելով նոր ժամանակներու աներկբայ արդարահատոյցը: Անոնց գաղափարական արժանաւոր արիութիւնը միայն այդ ձեւով պիտի յագենայ եւ բաւարարութիւն ստանայ:
Հոս, թէեւ ճիշդ չէ յիշատակել Ռամիլ Սաֆարով մարդասպանին օրինակը, մէկը որ սոսկական ոճրագործ է, որ յանդըգնեցաւ անպաշտպան ննջող հայ սպային վատաբար սպաննել: Այդ գձուձ բարացուցական արարքին որպէս հատուցում, ան արժանացաւ Ատրպէյճանի պետութեան հերոսի տիտղոսին, նիւթական վարձատրութեան եւ կառավարութեան հոգատարութեան, մինչ մեր քաղբանտարկեալին զլացուեցաւ պետական «հանրային ողջագուրում», երբ նահատակ սպայ Գուրգէն Մարգարեանի արիւնը դեռ ե՛ւս չորցած չէ։
Այսօր, թրքական կառավարութիւնը անակնկալի եկած Համբիկ Սասունեանի ազատ արձակման լախտի հարուածէն, իր վրդովմունքը կ’արձանագրէ՝ «սխալ» որակելով որոշումը եւ հաստատելով, որ ան «ահաբեկչութեան ի նպաստ զիջում համարուող վտանգ է» ու «ահաբեկչութեան քաղաքական նպատակներու ծառայեցման» կը միտի, մոռնալով որ ինք յականէ անուանէ պետական ահաբեկչական շարժում հովանաւորող ու հարեւան երկիրներու անդորրը խանգարող սադրիչ պետութիւն է։
Համբիկին բանտային 38 տարուան պահուածքը, իր աներեր համբերութիւնը եւ անկոտրում կամքը, ներշնչման աղբիւր եւ ներուժ դարձան վտարանդի սերունդներուն, որոնք Սասունեաններու օրինակը դարձուցին իրենց վէմը։
Թեհլիրեանները եւ անոնց յետնորդները կը համենան մնալ ազգային հերոսներ: Անոնց սխրագործութիւնը պէտք չէ սահմանել որպէս հատուածի մը, կամ սոսկ խմբակի մը արգասիքն ու պարծանքը։
Հասկցողներուն շա՜տ բարեւ։
Թորոնթօ 2 Նոյեմբեր, 2021
Ժան Հալլաճեան