Ինքզինք յարգող ժողովուրդը իր ինքնապաշտպանութեան յոյսը կը դնէ նախ իր բազուկին, իր զէնքին վրայ։
Գ. Նժդեհ
1991-ին, Հայաստանի Հանրապետութեան կառավարութեան որոշումով, Նախարարութեան խորհուրդին մէջ ստեղծուեցաւ Պաշտպանութեան պետական կոմիտէ, իսկ 5 Հոկտեմբերէն սկսեալ, ՀՀ նախագահի հրամանով, պաշտպանութեան նախարար նշանակուեցաւ Վազգէն Սարգսեան։ 28 Յունուար 1992-ին պատմական որոշում ընդունուեցաւ «Հայաստանի Հանրապետութեան Պաշտպանութեան Մասին»՝ այդ ձեւով յայտնելով Հայկական Ազգային Բանակի ստեղծումը: Ըլլալով պաշտպանութեան նախարարի պաշտօնին վրայ՝ Հայաստանի նախագահ Սերժ Սարգսեան այսպէս բնութագրած է բանակին անցած ճանապարհը. «Մեր բանակը կարճ պատմական ժամանակամիջոցին` անցնելով ծանր փորձութիւններ՝ պատերազմներով եւ բանակի խաղաղ կառուցումով, թրծուած է եւ դարձած է մեր անկախութեան գլխաւոր երաշխիքը եւ այսուհետեւ հպարտութեան եւ ներշնչումի աղբիւր է»: Հայկական Բանակին ձեւաւորման եւ զարգացման մասին խօսելով` կարելի է առանձնացնել երեք հիմնական փուլ: Առաջին փուլ (1989 Փետրուարէն` 1992 Մայիս)՝ հայ-ատրպէյճանական յարաբերութիւններու սրացման շրջանը, կամաւորներու ջոկատները ապահոված էին Հայաստանի եւ Լեռնային Ղարաբաղի անվտանգութիւնը: Երկրորդ փուլը (1992 Յունիսէն` 1994 Մայիս) կապուած է պատերազմական պայմաններու մէջ ազգային Բանակի ձեւաւորման հետ: Երրորդ փուլը (1994 Յունիսէն մինչեւ մեր օրերը) կոչած են «բանակի կառուցում»: Հայաստանի պաշտպանութեան նախարարի խօսքին համաձայն, խաղաղ պայմաններու մէջ հիմնական ուշադրությունը սեւեռուած է զօրքերու տեսակներու զարգացմանըշ, բանակի եւ հասարակութեան միջեւ կապի ամրապնդման եւ զինուորական ծառայողներու կեանքի պայմաններու բարելաւմանը: 2007 Յունուարին Հայաստանի բանակը նշած է հիմնադրումը 15-ամեակը: Փորձագէտները կը կարծեն, որ Հայաստանի բանակը իրաւապէս կարելի է համարել ամենամարտունակը տարածաշրջանի մէջ: