Այս պատճառով ալ Դամասկոս տարածաշրջանի մասնաւորաբար արաբական երկիրներուն բացուելու քաղաքականութիւնը դրականօրէն, քայլ առ քայլ յառաջ կը տանի՝ խրախուսելու ներդրումներն ու տնտեսութեան զարգացման նախագիծերը որպէս փրկարար հիմնական ազդակներ:

Սուրիան  որ 2011-էն սկսեալ պատերազմի կործանարար հետեւանքները կը կրէր, յաջորդական արտաքին շարք մը ճգնաժամերէ եւս ազդուեցաւ, ինչպէս՝ պսակաձեւ ժահրի համաճարակէն, Ուքրանիոյ պատերազմէն եւ վերջապէս Փետրուար 2023-ին Սուրիան հարուածած աղիտալի երկրաշարժէն:

Հետեւաբար երկիրը ինչպէ՞ս եւ ի՞նչ միջոցներով պիտի կարենայ դուրս ելլել տնտեսական այս բարդ կացութենէն:

Տնտեսութեան բարելաւման մեծագոյն խոչընդոտը նախ եւ առաջ պատերազմին հետեւանքով երկրին ենթակառոյցներու փլուզումն է, որ վերանորոգուելու համար հսկայ ներդրումներու եւ երկար ժամանակի կը կարօտի:

Երկրորդ խոչընդոտը պատերազմի առաջին տարիներէն ի վեր Սուրիոյ ոչ միայն քարիւղի հանքերուն, այլեւ հիւսիսային շրջանի ողջ սննդակողովին՝ ցորենի, բամպակի ու քարիի տարածուն դաշտերուն ԱՄՆ-ի կողմէ հովանաւորուող ուժերու ազդեցութեան տակ ինկած ըլլալն է:

Իսկ երրորդ խոչընդոտը «Կայսեր» պատիժն է, որուն պատճառով առեւտուրն ու արտադրութիւնը մեծապէս կը վնասուին եւ ներդրումային շատ մը ծրագիրներ կը խափանուին:  Սուրիական դրամանիշին անկումը եւս իր բացասական ազդեցութիւնը կ’ունենայ տնտեսութեան բարելաւման վրայ, սպառողին վրայ բարդելով  տնտեսութեան նահանջի ողջ հետեւանքը:

Այսօր Սուրիոյ ժողովուրդին 90 առ հարիւրը կը գտնուի աղքատութեան վտանգի սեմին:

Հետեւաբար Սուրիան բացուելով տարածաշրջանի յատկապէս արաբական երկիրներուն, առիթ մը ստեղծած պիտի ըլլայ թէկուզ փոքր ու երկար ժամանակի վրայ արդիւնաւորուող քայլ մը առնելու վերականգնումի ուղղութեամբ:

Հաւանաբար ինչպէս ներքին, այնպէս ալ արտաքին զբօսաշրջութեան ոլորտի աշխուժացումն ու արտածումի խրախուսումը յոյսի նշոյլներ կարենան հաղորդել տնտեսութեան՝ յատկապէս արաբական երկիրներու հետ գործակցութեան դաշտին մէջ:

Մինչ այդ կարելի է կրկին թափ տալ տնտեսական փոքր ծրագիրներու աճին, զայն դարձնելու տնտեսական  ազգային քաղաքականութեան էական եւ առանցքային մաս՝ մէկէ աւելի մակարդակներու վրայ, խթանելու այս տեսակի տնտեսութիւնը՝ ապահովելով օրէնսդրական, իրաւական եւ հաստատութենական համապատասխան միջավայր անոր կիրարկման եւ զարգացման համար:

Եւ վերջապէս  արաբական երկիրներու հետ գործակցութեան բարձր մակարդակն ու տնտեսութեան ներքին դաշտի կարգաւորումը, միաժամանակ փտածութեան աստիճանական վերացումը դրական անդրադարձ կրնան ունենալ Սուրիոյ տնտեսութեան այնքան սպասուած ապաքինման վրայ: